চিটাৰা ডেস্ক, ১৭ মাৰ্চ: আনন্দ পণ্ডিতে প্ৰযোজনা কৰা ছবি 'চেহৰে'ৰ প্ৰচাৰ কাৰ্যসূচীৰ পৰা আঁতৰি আছে বলীউড অভিনেত্ৰী ৰিয়া চক্ৰৱৰ্তী । ৰিয়াৰ অনুপস্থিতিয়ে এতিয়া নানান কৌতুহলৰ সৃষ্টি কৰিছে । ছবিখনত ৰিয়াৰ চৰিত্ৰ কৰ্তন কৰা হৈছে নেকি বুলিও বহুতেই প্ৰশ্ন উত্থাপন কৰিছে । অহা ১৮ মাৰ্চ অৰ্থাৎ বৃহস্পতিবাৰে ছবিখনৰ ট্ৰেইলাৰ মুকলি কৰা হ'ব । কিন্তু ছবিখনৰ প্ৰচাৰ কাৰ্যসূচীত অংশ লোৱা নাই ৰিয়াই ।
কেৱল এয়াই নহয়, শেহতীয়াকৈ অমিতাভ বচ্চন আৰু ইমৰাণ হাছমীৰ একক পোষ্টাৰ মুকলি হৈছে যদিও ৰিয়া চক্ৰৱৰ্তীৰ একক পোষ্টাৰ এতিয়াও মুকলি হোৱা নাই । অৱশ্যে ছবিখনত বিগ বি আৰু ইমৰাণে মুখ্য চৰিত্ৰ ৰূপায়ণ কৰিছে । ৰিয়াক 'চেহৰে' ছবিৰ পৰা আঁতৰ কৰা হৈছে নেকি বুলি সোধা প্ৰশ্নৰ উত্তৰত প্ৰযোজক আনন্দ পণ্ডিতে কয় যে, সঠিক সময়ত এই বিষয়ত সকলো কথা ৰাজহুৱা কৰা হ'ব ।