তামিল ছবি 'বিক্ৰম বেধা'ৰ হিন্দী ৰিমেকত অভিনয় কৰিব ছৈফ আলী খানে

বলীউড অভিনেতা ছৈফ আলী খানে তামিল ছবি 'বিক্ৰম বেধা'ৰ হিন্দী ৰিমেকত এগৰাকী আদৰ্শৱান আৰক্ষী বিষয়াৰ চৰিত্ৰ ৰূপায়ণ কৰিবলৈ সাজু হৈছে । শেহতীয়া কেইবাখনো ছবিত ছৈফক খলনায়কৰ চৰিত্ৰ ৰূপায়ণ কৰা দেখা গৈছে।

চিটাৰা ডেস্ক, ২০ জানুৱাৰী: তামিল ছবি 'বিক্ৰম বেধা'ৰ হিন্দী ৰিমেকত দেখা পোৱা যাব বলীউড অভিনেতা ছৈফ আলী খান আৰু ঋত্বিক ৰোছনক । ২০১৭ চনত মুক্তি লাভ কৰা তামিল ছবিখনে দৰ্শকৰ বিপুল সঁহাৰি লাভ কৰিবলৈ সক্ষম হৈছিল । 'বিক্ৰম বেধা'ত ছৈফে এগৰাকী আদৰ্শৱান আৰক্ষী বিষয়াৰ চৰিত্ৰ ৰূপায়ণ কৰিব । ছৈফে কৈছে যে, এই চৰিত্ৰটোৱে এক পৰিৱৰ্তন আনিব । কিয়নো, শেহতীয়া কেইবাখনো ছবিত ছৈফক খলনায়কৰ ৰূপত দেখা গৈছে । এইবাৰ ভাল ব্যক্তিৰ চৰিত্ৰ ৰূপায়ণ কৰিব বুলি মন্তব্য কৰিলে ছৈফে ।

তামিল ছবিখনত বিক্ৰমৰ চৰিত্ৰত অভিনয় কৰিছিল আৰ মাধৱনে আৰু গেংষ্টাৰ বেধাৰ চৰিত্ৰ ৰূপায়ণ কৰিছিল বিজয় ছেঠুপতিয়ে । ছবিখনৰ হিন্দী ৰিমেকত ঋত্বিকে গেংষ্টাৰ বেধাৰ চৰিত্ৰ ৰূপায়ণ কৰিব আৰু ছৈফক দেখা যাব আৰক্ষী বিষয়াৰ ৰূপত । ৱেবলইডৰ সৈতে হোৱা সাক্ষাৎকাৰত ছৈফে কয় যে, 'বিক্ৰম বেধা'ত আদৰ্শৱান আৰক্ষী বিষয়াৰ চৰিত্ৰটোৰ জৰিয়তে তেওঁ দৰ্শকক অধিক মনোৰঞ্জন দিবলৈ চেষ্টা কৰিব । পূৰ্বে এই ছবিখনত ঋত্বিকৰ ঠাইত আমিৰ খানে অভিনয় কৰাৰ কথা আছিল । 'বিক্ৰম বেধা'ৰ হিন্দী ৰিমেক নিৰ্দেশনা কৰিব পুষ্কৰ গায়ত্ৰীয়ে ।

লগতে পঢ়ক:ভাৰত বনাম অষ্ট্ৰেলিয়া : ভাৰতৰ ঐতিহাসিক জয়ৰ পাচত প্ৰশংসাত পঞ্চমুখ বি-টাউন