চিটাৰা ডেস্ক, ১৮ অক্টোবৰ: ৰশ্মিকা মন্দান্না, কেৱল দক্ষিণ ভাৰততে নহয়, এতিয়া বলীউডতো নিজৰ স্থান নিশ্চিত কৰিবলৈ সক্ষম হোৱা এগৰাকী সফল অভিনেত্ৰী । বিভিন্ন ভাষাৰ ছবিৰ কামত এতিয়া ব্যস্ত হৈ আছে অভিনেত্ৰীগৰাকী । ছ'চিয়েল মিডিয়াত লাখ লাখ অনুৰাগী আছে ৰশ্মিকাৰ । জনপ্ৰিয়তাৰ দৌৰত বহু অভিনেতা, অভিনেত্ৰীক পিছ পেলাইছে ৰশ্মিকাই ।
শেহতীয়াকৈ ফৰ্বছ ইণ্ডিয়াই প্ৰকাশ কৰা প্ৰভাৱশালী তাৰকাৰ তালিকাত শীৰ্ষ স্থানত আছে ৰশ্মিকা মন্দান্নাৰ নাম । এই তালিকাত ৰশ্মিকাই বিজয় দেবেৰাকোন্দা, সামন্থা আৰু যশকো চেৰ পেলাইছে । তেলেগু আৰু কানাড়া ছবিত অভিনয় কৰি অনুৰাগীৰ মন জয় কৰা ৰশ্মিকাই ছ'চিয়েল মিডিয়াত সৰ্বাধিক ফল'ৱাৰ্ছ থকাৰ বাবে তালিকাখনৰ শীৰ্ষ স্থান লাভ কৰিছে । এই তালিকাৰ দ্বিতীয় স্থানত আছে পেলি চুপুলু আৰু অৰ্জুন ৰেড্ডীৰ ছবিৰ জৰিয়তে খ্যাতি অৰ্জন কৰা বিজয় দেবেৰাকোন্দা আৰু তাৰ পিছত আছে কানাড়া ছবিৰ অভিনেতা যশ ।
সামান্থা ৰুথ প্ৰভু এই তালিকাত চতুৰ্থ স্থানত আছে আৰু আল্লু অৰ্জুন আছে পঞ্চম স্থানত । লাইক, মন্তব্য, ভিডিঅ' চোৱা, আৰু সামাজিক মাধ্যমত তাৰকাৰ ফল'ৱাাৰ্ছৰ সংখ্যা আদিৰ ভিত্তিত ফৰ্বছ ইণ্ডিয়াৰ প্ৰভাৱশালী তাৰকাৰ তালিকা প্ৰকাশ কৰা হয় ।