দীপিকাৰ সৈতে ৰণবীৰৰ শেহতীয়া ফটো শ্বেয়াৰ

ছ'চিয়েল মিডিয়াযোগে পত্নী দীপিকা পাডুকনৰ সৈতে উঠা ফটো শ্বেয়াৰ কৰিলে ৰণবীৰ সিঙে । প্ৰায় দুমাহৰ অন্তত পত্নীৰ সৈতে একেলগে ফটো শ্বেয়াৰ কৰিলে ৰণবীৰে । মাৰ্শ্বিয়েল আৰ্টৰ দক্ষতা প্ৰদৰ্শন কৰি অনুৰাগীৰ দৃষ্টি আকৰ্ষণ কৰিলে অভিনেতা বিকী কৌশলেও ।

চিটাৰা ডেস্ক,১৩ মাৰ্চ: সপ্তাহৰ অন্তিম দিনটো উদযাপন কৰাৰ বাবে যেন উৎসাহিত হৈছে বলীউডৰ তাৰকাসকল । ছ'চিয়েল মিডিয়াত দেখা পোৱা গৈছে ইজনৰ পিছত সিজন বলীউড তাৰকাৰ নতুন নতুন ফটো, ভিডিঅ' । ৰান্থামভ'ৰ ভ্ৰমণৰ স্মৃতি ৰোমন্থন কৰি শনিবাৰে ইনষ্টাগ্ৰাম পোষ্টযোগে দীপিকা পাডুকনৰ সৈতে উঠা ফটো শ্বেয়াৰ কৰিলে ৰণবীৰ সিঙে । ফটোখনত দুয়োকে গৰম কাপোৰ পৰিধান কৰা দেখা গৈছে ।

আলিয়া ভাট, ৰণবীৰ কাপুৰ আৰু নীতু কাপুৰৰ সৈতে নতুন বছৰৰ আৰম্ভণিতে দীপিকা আৰু ৰণবীৰে ৰাজস্থানৰ ৰান্থামভ'ৰ ৰাষ্ট্ৰীয় উদ্যানলৈ যাওঁতে এই ফটোখন তোলা হৈছিল । ফটোখন শ্বেয়াৰ কৰি ৰণবীৰে লিখিছে যে, এই ফটোখনত এঘণ্টাতকৈও কম সময়ৰ ভিতৰত ৪ লাখতকৈ অধিক অনুৰাগীয়ে 'লাইক' কৰিছিল । ৰণবীৰে দীপিকাৰ সৈতে অতিবাহিত কৰা ভাল লগা মুহুৰ্তবোৰ মনত পেলাই আনন্দিত হোৱা দেখা যায় ।

আনহাতে, বিকী কৌশলে আগন্তুক ছবি 'দ্য ইমম’ৰ্টেল অশ্বত্থামা'ৰ বাবে প্ৰস্তুতি অব্যাহত ৰাখিছে । ৰাষ্ট্ৰীয় বঁটাপ্ৰাপ্ত অভিনেতাগৰাকীয়ে ইনষ্টাগ্ৰাম পোষ্টযোগে এটা ভিডিঅ' শ্বেয়াৰ কৰিছে, য'ত মাৰ্শ্বিয়েল আৰ্টৰ দক্ষতা প্ৰদৰ্শন কৰা দেখা গৈছে । ভিডিঅ' শ্বেয়াৰ কৰি বিকীয়ে লিখিছে যে, "পৰ্বতৰ দৰে হওঁক আৰু এখন ডাঙৰ নদীৰ দৰে প্ৰবাহিত হওঁক" । উল্লেখ্য যে, ৰণবীৰ বৰ্তমান '৮৩' আৰু 'জয়েশভাই জোৰদাৰ'ৰ মুক্তিৰ অপেক্ষাত আছে ।

লগতে পঢ়ক: এতিয়াৰে পৰা Spotifyত ১২ টা ভাৰতীয় ভাষাত উপলব্ধ হ'ব সংগীত