বলীউডৰ তাৰকাসকলক কি উপদেশ দিলে নৰেন্দ্ৰ মোডীয়ে ?

মহাত্মা গান্ধীকলৈ চিনেমা নিৰ্মাণ কৰাৰ বাবে বলীউডক অনুপ্ৰাণিত কৰাৰ প্ৰয়াস প্ৰধানমন্ত্ৰীগৰাকীৰ

চিটাৰা ডেস্ক,20 অক্টোবৰঃ চিনেমা এনে এক মাধ্যম যাৰ জৰিয়তে খুব সহজতে কোনো গুৰুত্বপূৰ্ণ,গম্ভীৰ আলোচনা ,কোনো বাৰ্তা জনসাধাৰণৰ ওচৰলৈ নিব পাৰি ৷ প্ৰধানমন্ত্ৰী মোডীয়ে এই কথা ভালদৰে উপলদ্ধি কৰে ৷ শেহতীয়াকৈ শনিবাৰে এই সন্দৰ্ভত বলীউডৰ বহু তাৰকাৰ সৈতে আলোচনাত মিলিত হয় প্ৰধানমন্ত্ৰী মোডী ৷ গান্ধীজীৰ 150 বৰ্ষীয়া জন্ম জয়ন্তীত বলীউডৰ তাৰকাসকলক মহাত্মা গান্ধীৰ ওপৰত ছবি নিৰ্মাণ কৰাৰ অৰ্থে অনুপ্ৰেৰিত কৰে ৷ এই অনুষ্ঠানত শ্বাহৰুখ খান , আমিৰ খান, কংগনা ৰাণাৱত , জেকলিন ফাৰ্ণাণ্ডেজ, ইমতিয়াজ আলী , একতা কাপুৰৰ দৰে বহু জনপ্ৰিয় তাৰকা উপস্থিত থাকে ৷

নৰেন্দ্ৰ মোডীৰ সৈতে বলীউডৰ তাৰকা

নৰেন্দ্ৰ মোডীৰ সৈতে তাৰকাৰ চেল্ফি

অনুষ্ঠানত নৰেন্দ্ৰ মোডীৰ সৈতে তাৰকা

মোডীয়ে সকলোকে উদ্দেশ্য কৰি কয় যে, "গান্ধীজী হ'ল সৰলতাৰ প্ৰতীক ৷ তেওঁৰ ভাৱধাৰা সকলোতে ধ্বনিত হৈ আছে ৷ আমাৰ দেশ তথা পৃথিৱীখনক পুনৰ এবাৰ গান্ধীজীক পৰিচিত কৰাৰ প্ৰয়োজন ৷ আমাৰ চলচ্চিত্ৰ উদ্যোগত এই সময়ত গান্ধীজীক লৈ চলচ্চিত্ৰ নিৰ্মাণ কৰাৰ প্ৰয়োজন আহি পৰিছে সেয়া কেৱল ব্যৱসায়ৰ অৰ্থে নহয় ৷ " আলোচনাৰ পিছত মোডীয়ে এই প্ৰসংগ নিজৰ টুইটাৰ যোগেও ব্যক্ত কৰে ৷

লগতে উল্লেখনীয় কথা যে, শীঘ্ৰেই চলচ্চিত্ৰ জগতৰ স'তে সাঙুৰ খাব " anti-camcording " বিল ৷ সদনৰ আগন্তুক শীতকালীন বৈঠকত এই বিল উত্থাপন কৰিব কেন্দ্ৰীয় চৰকাৰে ৷ শনিবাৰে ফিল্ম ফেটাৰনিটিৰ স'তে হোৱা মত বিনিময়ত এই কথা স্পষ্ট কৰে প্ৰধানমন্ত্ৰী নৰেন্দ্ৰ মোডীয়ে ৷