চিটাৰা ডেস্ক, 28 ছেপ্তেম্বৰ : লতা মংগেশকাৰৰ 92 সংখ্যক জন্মদিন উপলক্ষে তেওঁৰ অনুৰাগীসকলে বিশাল ভৰদ্বাজ আৰু গুলজাৰৰ পৰা এটি গীত উপহাৰ হিচাপে পাব ৷ ‘ঠিক নহী লগতা’ নামৰ এই গীতটি লতা মংগেশকাৰে 90 ৰ দশকতে গাইছিল যদিও গীতটি মুক্তিলাভ কৰা নাছিল ৷ গীতটিৰ শব্দ আছিল গুলজাৰৰ আৰু গীতটি পৰিচলনা কৰিছিল বিশাল ভৰদ্বাজে ৷
এই ৰোমাণ্টিক গীতটি Maachis (1996) নামৰ ছবিখনৰ আছিল, যিখন ছবিৰ মুখ্য নায়িকা হিচাপে ঐশ্বৰ্য ৰায়ক বাচনি কৰা হৈছিল ৷ কিন্তু বিশেষ কাৰণত ছবিখনৰ নিৰ্মাণৰ কাম স্থগিত হৈ পৰাত গীতটি মুক্তি দিব পৰা নগ’ল ৷ গীতটিৰ সন্দৰ্ভত বিশাল ভৰদ্বাজে কয়, ‘মই প্ৰায় 10-12 বছৰ ধৰি গীতটি বিচাৰি আছিলো কিন্তু বিচাৰি পোৱা নাছিলো ৷ তেতিয়াই প্ৰায় তিনিবছৰ পূৰ্বে এটা ষ্টুডিঅ’ই মোক কল কৰি জনায় যে তেওঁলোকে টেপটো বিচাৰি পাইছে ৷’
প্ৰায় 7 টা দশক ধৰি ভাৰতীয় শ্ৰোতাৰ মন মুহি ৰাখিছিল বলীউডৰ নাইটিংগেল লতা মংগেশকাৰে ৷ তেওঁ 1000 তকৈও অধিক বলীউডৰ ছবিত কণ্ঠ নিগৰোৱাৰ লগতে 36 খন বিদেশী ভাষাৰ ছবি আৰু আঞ্চলিক ভাষাৰ ছবিতো কণ্ঠদান কৰিছিল ৷ 1974 চনত Royal Albert Hall ত সংগীত পৰিৱেশন কৰা প্ৰথমগৰাকী ভাৰতীয় হিচাপে পৰিচিত হৈ পৰে Queen of Melody লতা মংগেশকাৰ ৷
আহক তেওঁৰ জন্মদিন উপলক্ষে তেওঁ কণ্ঠ নিগৰোৱা কেইটিমান জনপ্ৰিয় গীতৰ মাজলৈ উভতি যাও-
প্যাৰ কিয়া তো ডৰনা ক্যা (Mughal-e-Azam, 1960)
এই গীতটি ৰচনা কৰিছিল সংগীত পৰিচালক নৌচাদ আৰু গীতটোৰ শব্দ আছিল শ্বাকিল বাদায়ুনীৰ ৷ গীতটি বিশেষকৈ ভাৰতীয় শাস্ত্ৰীয় সংগীত কৰা অনুপ্ৰেৰণা গ্ৰহণ কৰি ৰচনা কৰা হৈছিল ৷
খবৰ অনুসৰি, যিহেতু সেই দিনবোৰত গানটোত শুনা শব্দৰ প্ৰতিধ্বনি ৰখাৰ বাবে কোনো প্ৰযুক্তি নাছিল, নৌশাদে মংগেশকাৰক ষ্টুডিঅ'ৰ বাথৰুমত গানটো গাবলৈ দিছিল ৷
অজীৱ দাসতা হ্যেয় য়ে (Dil Apna Aur Preet Parai, 1960)
শৈলেন্দ্ৰৰ গীতৰ সৈতে, চলচ্চিত্ৰখনৰ সংগীত শংকৰ জয়কিষাণৰ ৰচিত। গীতটো ৰাজকুমাৰ আৰু মীনা কুমাৰীৰ ওপৰত চিত্ৰিত । শংকৰ জয়কিষাণে ছবিখনৰ বাবে ফিল্মফেয়াৰ শ্ৰেষ্ঠ সংগীত পৰিচালকৰ বঁটা লাভ কৰিছিল ।
আপকী নজৰো নে সমঝা (Anpadh, 1962)
এই যুগজয়ী গীতটো 1962 চনত মুক্তিলাভ কৰা ছবি Anpadh ৰ ৷ লতা মংগেশকাৰে কণ্ঠ নিগৰোৱা গীতটিত অভিনয় কৰিছে মালা সিন্হা, ধৰ্মেন্দ্ৰ আৰু বলৰাজ চাইনী ৷ ছবিখনৰ সংগীত পৰিচলানাৰ দায়িত্বত আছিল মদন মোহন আৰু গীতটো লিখিছিল ৰাজা মেহদী আলী খানে ৷
লগ জা গলে (Woh Kaun Thi, 1964)
এই গীতটো লতা মংগেশকাৰৰ অন্যতম শ্ৰেষ্ঠ গীতসমূহৰ ভিতৰত এটা ৷ ছবিখনৰ সংগীত কৰিছিল মদন মোহন কোহলীয়ে আৰু গীতিকাৰ আছিল ৰাজা মেহদী আলী খান ৷ এই গীতটিত ৰূপালী পৰ্দাত অভিনয় কৰিছিল বলীউড অভিনেত্ৰী সাধনাই ৷