চিটাৰা ডেস্ক,19 ডিচেম্বৰ : এতিয়াও চৰ্চাত আছে কংগনা ৰাণাৱটৰ আক্ৰমণ-প্ৰত্যাক্ৰমণ ৷ এইবাৰ কমেডীয়ান চালোনী গৌৰৰ ‘Kangana Runout talks to Siri’ শীৰ্ষক শেহতীয়া ইউটিউব ভিডিঅ’ক লৈ ক্ষুব্ধ হৈ পৰিছে অভিনেত্ৰীগৰাকী ৷
চালোনী গৌৰ হৈছে এগৰাকী কমেডীয়ান ৷ তেওঁ সামাজিক-ৰাজনৈতিক বিষয়বস্তুৰে দৰ্শকৰ আগত দাঙি ধৰা নাজমা আপী আৰু আদৰ্শ বোৱাৰী চৰিত্ৰৰ বাবে জনাজাত ৷ চালোনীয়ে ইতিমধ্যে অভিনেত্ৰী সোনম কাপুৰ, অনন্যা পাণ্ডে আৰু চাৰা আলী খানৰ নকল কৰি দৰ্শকৰ পৰা যথেষ্ট সঁহাৰি লাভ কৰে ৷ শেহতীয়াকৈ কংকনা ৰাণাৱটৰ নকল কৰি শ্বেয়াৰ কৰা এক ভিডিঅ’ই পূৰ্বৰ জনপ্ৰিয়তা ভংগ কৰি দৰ্শকৰ মাজত অধিক জনপ্ৰিয় হৈ পৰে ৷
কংগনাৰ নকল ৰূপ ধাৰণ কৰি চালোনীয়ে এপল ব্যৱহাৰকাৰীসকলৰ বাবে এটি ভিডিঅ’ শ্বেয়াৰ কৰে ৷ ভিডিঅ’টিত চালোনীয়ে চিৰিক বলিউডৰ সৰ্বশ্ৰেষ্ঠ অভিনেত্ৰী কোন বুলি প্ৰশ্ন কৰে ৷ চালোনীয়ে কংগনাৰ নাম শুনিবলৈ অপেক্ষা কৰে যদিও চিৰিয়ে প্ৰিয়ংকা চোপ্ৰা, দীপিকা পাডুকন, তাপসী পান্নু আৰু স্বৰা ভাস্কৰৰ নামহে উল্লেখ কৰে ৷ ইয়াৰ পাচতে কংগনা ৰূপী চালোনীৰ খং উঠে ৷