চিটাৰা ডেস্ক,১৭ মাৰ্চ: মহামাৰীৰ সংকট কিছু পৰিমাণে শাম কটাৰ পিছতে খোলা হৈছে ছবিগৃহসমূহ । কিন্তু ছবিগৃহ খোলাৰ পিছতে আন এক সমস্যাৰ সৃষ্টি হৈছে । লক ডাউন আৰু মহামাৰীৰ বাবে মুক্তিৰ দিন স্থগিত কৰা ছবিসমূহ এতিয়া মুক্তি দিয়া হৈছে । ইয়াৰ লগতে এই সময়ত মুক্তি দিয়াৰ বাবে পূৰ্বে দিন নিৰ্ধাৰণ কৰি থোৱা ছবিসমূহ আছেই । মুঠতে ছবি মুক্তিৰ দিনকলৈ এতিয়া বিমোৰত পৰিছে নিৰ্মাতাসকল ।
এনে এক সমস্যাৰ পৰিপ্ৰেক্ষিততে জন আব্ৰাহামৰ এক্সন ছবি 'সত্যমেৱ জয়তে-২' এতিয়া ছলমান খানৰ 'ৰাধে: ইয়ৰ ম'ষ্ট ৱাণ্টেড ভাই'ৰ সৈতে একেটা দিনতে মুক্তি দিবলগীয়া হৈছে । ১৩ মে'ত পবিত্ৰ ঈদৰ দিনাই মুক্তি লাভ কৰিব দুয়োখন ছবি । শেহতীয়াকৈ 'সত্যমেৱ জয়তে-২'ৰ এখন নতুন পোষ্টাৰ টুইটযোগে শ্বেয়াৰ কৰিছে জন আব্ৰাহামে । ছবিখনত আব্ৰাহামে দ্বৈত চৰিত্ৰত অভিনয় কৰিছে ।