গামোছা প্ৰত্যাখান সন্দৰ্ভত কি ক'লে য়ামী গৌতমে ?

গ্ৰেট গুৱাহাটী মাৰাথনৰ বাবে গুৱাহাটীলৈ আহিছে বলীউডৰ জনপ্ৰিয় অভিনেত্ৰী য়ামী গৌতম ৷ শেহতীয়াকৈ সৃষ্টি হোৱা গামোছা বিতৰ্ক সন্দৰ্ভত নিজৰ মন্তব্য প্ৰকাশ কৰিলে য়ামী গৌতমে ৷

চিটাৰা ডেস্ক,2 মাৰ্চঃ শেহতীয়াকৈ গামোছা বিতৰ্কত সোমাই পৰিছে বলীউডৰ জনপ্ৰিয় অভিনেত্ৰী য়ামী গৌতম ৷ গ্ৰেট গুৱাহাটী মাৰাথন 2020ৰ ফ্লেগ অফ কৰিবৰ বাবে দেওবাৰে গুৱাহাটীত আহি উপস্থিত হৈছিল অভিনেত্ৰীগৰাকী ৷ বৰঝাৰ বিমান বন্দৰত উপস্থিত হোৱাৰ পিছত এগৰাকী অনুৰাগীয়ে য়ামীক গামোছা পিন্ধাবলৈ উদ্যত হৈছিল ৷ কিন্তু সেই সময়তে য়ামীয়ে অনুৰাগীজনৰ হাতৰ পৰা গামোছা প্ৰত্যাখান কৰাত অসন্তুষ্ট হৈ পৰে একাংশ অসমীয়া অনুৰাগী ৷ গামোছাৰ দৰে জাতীয় আৱেগক অপমান কৰিব খোজা বুলি একাংশই যথেষ্ট দুখ প্ৰকাশ কৰে ৷

কিন্তু অভিনেত্ৰীগৰাকীয়ে কিছু সময়ৰ পিছতে সমগ্ৰ কথাৰ স্পষ্টীকৰণ দিয়ে চ'ছিয়েল মিডিয়াযোগে ৷ অভিনেত্ৰীগৰাকীয়ে এই সন্দৰ্ভত কয় যে, অনুৰাগী গৰাকী তেনেকৈ কাষ চাপি অহাত নিজক অসুৰক্ষিত অনুভৱ কৰি সেই সময়ত তেওঁ তেনেকুৱা ধৰণৰ আচৰণ কৰে ৷

লগতে কয়, এইয়া তেওঁৰ তৃতীয়বাৰৰ বাবে অসম ভ্ৰমণ ৷ তেওঁ সদায়েই অসমীয়া সংস্কৃতি আৰু অসমীয়া মানুহৰ প্ৰতি মৰম প্ৰদৰ্শন কৰি আহিছে ৷ সমগ্ৰ ঘটনাটো এটা ফালৰ পৰা চাই মন্তব্য কৰাটো বা ঘৃণা কৰাটো খুবেই সংবেদনশীল বিষয় ৷

পৰৱৰ্তী সময়ত গ্ৰেট গুৱাহাটী মাৰাথন 2020ৰ ফ্লেগ অফ কৰাৰ পিছত অসমীয়া গামোছা আৰু জাপিৰ সৈতে উঠা এখন ফটো সুন্দৰ কেপচনেৰে সৈতে চ'ছিয়েল মিডিয়া যোগে শ্বেয়াৰ কৰে অভিনেত্ৰীগৰাকীয়ে ৷

লগতে পঢ়কঃগামোছা ল’বলৈ অমান্তি বলিউদৰ জনপ্ৰিয় অভিনেত্ৰী