দিল বেচাৰাই মুক্তিৰ পূৰ্বে ভাঙিলে চুপাৰহিট হলীউড ছবিৰ ৰেকৰ্ড

সুশান্ত সিং ৰাজপুতৰ অন্তিমখন ছবি দিল বেচাৰাৰ ট্ৰেইলাৰটোৱে মুক্তিৰ পিছতে ইউটিউবত বিশেষ ৰেকৰ্ড গঢ়িবলৈ সক্ষম হৈছে ৷ এই ট্ৰেইলাৰটোৱে বিশ্বৰ আটাইতকৈ ডাঙৰ ছবি এভেঞ্জাৰছঃএণ্ডগেম আৰু ইনফিনিটী ৱাৰকো পিছ পেলাইছে ৷

চিটাৰা ডেস্ক,7 জুলাইঃ সুশান্ত সিং ৰাজপুতৰ শেষৰ খন ছবি দিল বেচাৰাৰ বাবে অনুৰাগীসকল যথেষ্ট উৎসাহী হৈ থকাৰ লগতে যথেষ্ট আৱেগিক হৈ আছে ৷

বিগত 6 জুলাই তাৰিখে মুক্তি পালে ছবিখনৰ ট্ৰেইলাৰ ৷ ট্ৰেইলাৰটোৱে যথেষ্ট সমাদৰ লাভ কৰিলে দৰ্শকৰ পৰা ৷ ইমানেই দৰ্শকৰ মৰম পালে যে মুক্তিৰ পূৰ্বেই ছবিখনৰ ট্ৰেইলাৰে গঢ়িলে ৱৰ্ল্ড ৰেকৰ্ড ৷ ইউটিউবত আটাইতকৈ বেছি মানুহে চোৱা ট্ৰেইলাৰ হিচাপে ৰেকৰ্ড গঢ়িলে দিল বেচাৰাৰ ট্ৰেইলাৰটোৱে ৷

24ঘন্টাৰ ভিতৰত ইউটিউবত ট্ৰেইলাৰটোৱে 50 লাখ লাইক লাভ কৰিবলৈ সক্ষম হৈছে ৷ যি বৰ্তমানলৈকে আটাইতকৈ ডাঙৰ ব্লকবাষ্টাৰ ছবি এভেঞ্জাৰছঃইনফিনিটী ৱাৰ আৰু এভেঞ্জাৰছঃএণ্ডেগেমতকৈও অধিক ভিউজ পাবলৈ সক্ষম হৈছে ৷ বৰ্তমান সময়লৈকে ট্ৰেইলাৰটোৰ ভিউজৰ সংখ্যা 32 মিলিয়ন আৰু লাইকৰ সংখ্যা 6.3 মিলিয়ন ৷

জনাই থওঁ যে, মুকেশ ছাৱৰাই পৰিচালনা কৰিছে দিল বেচাৰানামৰ হিন্দী ৰোমান্টিক ছবিখন ৷ ছবিখনত সুশান্ত সিং ৰাজপুতৰ সৈতে অভিনয় কৰিছে নৱাগতা অভিনেত্ৰী সঞ্জনা সাংঘীয়ে ৷ ছবিখন অহা 24 জুলাইৰ দিনা ডিজিটেলি মুক্তি লাভ কৰিব ডিজনী প্লাছ হটষ্টাৰত ৷

লগতে পঢ়কঃসুশান্তৰ অন্তিমখন ছবিৰ ট্ৰেইলাৰে ভাবুক​ কৰি তুলিলে অনুৰাগীক