১৯৮৪ৰ শিখ বিৰোধী ৰায়তৰ আধাৰত নিৰ্মিত ছবিত অভিনয় কৰিব নেকি ডিলজিতে ?

আলী আব্বাছ জাফৰৰ আগন্তুক ছবিত অভিনয় কৰিব কণ্ঠশিল্পী, অভিনেতা ডিলজিৎ ড'ছঞ্জে । ১৯৮৪ৰ শিখ বিৰোধী ৰায়তৰ আধাৰত নিৰ্মাণ হ'ব আলী আব্বাছ জাফৰ আগন্তুক ছবিখন । কেইবাখনো পঞ্জাৱী আৰু হিন্দী ছবিত অভিনয় কৰা ডিলজিতক আলী আব্বাছৰ ছবিখনত এক ব্যতিক্ৰমী ৰূপত দেখা পোৱা যাব ।

চিটাৰা ডেস্ক, ২ জানুৱাৰী: পুনৰ বলীউড ছবিত অভিনয় কৰিবলৈ সাজু হৈছে জনপ্ৰিয় কণ্ঠশিল্পী, অভিনেতা ডিলজিৎ ড'ছঞ্জে । আলী আব্বাছ জাফৰ আগন্তুক ছবিত অভিনয় কৰিব ডিলজিতে । এক বিশেষ সূত্ৰই প্ৰকাশ কৰা তথ্য মতে, ১৯৮৪ৰ শিখ বিৰোধী ৰায়তৰ আধাৰত নিৰ্মাণ হ'বলগীয়া ছবিখন জাফৰে নিৰ্দেশনা নকৰে যদিও প্ৰজেক্টৰ ৰচিয়তা হিচাপে কাম কৰিব । চলিত মাহতে ছবিখনৰ দৃশ্যগ্ৰহণ আৰম্ভ কৰিবলৈ থিৰাং কৰিছে ছবি নিৰ্মাতাই ।

দীৰ্ঘ দিন ধৰি ১৯৮৪ৰ শিখ বিৰোধী ৰায়তৰ আধাৰত এখন ছবি নিৰ্মাণ কৰাৰ আশা মনত পুহি ৰাখিছিল জাফৰে । অৱশেষত নতুন বছৰতে ছবিখনৰ কাম আৰম্ভ কৰাৰ বাবে সাজু হৈছে । অৱশ্যে এতিয়াও ছবিখনৰ শিৰোনাম নিশ্চিত কৰা হোৱা নাই । দৃশ্যসজ্জাৰ কাম তেওঁ ব্যক্তিগতভাৱে নিৰীক্ষণ কৰিছে আৰু বেকড্ৰপটোৰ জৰিয়তে ১৯৮০ৰ ভাৰতক প্ৰতিফলিত কৰাৰ চেষ্টা কৰা হৈছে । আনহাতে, পঞ্জাৱী ছবি জ'ড়ীৰ জৰিয়তে প্ৰথমবাৰৰ বাবে ছবি নিৰ্মাতা হিচাপে আত্মপ্ৰকাশ কৰা ডিলজিৎ ড'ছঞ্জে এতিয়া ছবিখনৰ মুক্তিৰ অপেক্ষাত আছে ।

লগতে পঢ়ক:অ’টিটি প্লেটফ’ৰ্মত মুক্তিলাভ কৰিব বহু প্ৰত্যাশিত তামিল ছবি ‘দৃশ্যম 2’