চিটাৰা ডেস্ক, ২৩ এপ্ৰিল: কৰ'ণাত আক্ৰান্ত হৈ মৃত্যু সংগীত পৰিচালক শ্ৰৱণ ৰাথোড়ৰ । বৃহস্পতিবাৰে নিশা ৯.৩০ বজাত মৃত্যু হয় ৰাথোড়ৰ । মৃত্যু সময়ত তেওঁৰ বয়স আছিল ৬৬ বছৰ । পিতৃৰ মৃত্যুৰ খবৰ পুত্ৰ সঞ্জীৱ ৰাথোড়ে ছচিয়েল মিডিয়াযোগে জনায় । কৰ'ণাত আক্ৰান্ত হোৱাৰ পাচতে শ্ৰৱণ ৰাথোড়ক সোমবাৰে মুম্বাইৰ এছ এল ৰহেজা চিকিৎসালয়ত ভৰ্তি কৰোৱা হৈছিল । ইফালে, পুত্ৰৰ অভিযোগ যে, পিতৃৰ চিকিৎসাৰ বাবদ খৰচ হোৱা ১০ লাখ টকাৰ বিল পৰিশোধ নকৰাৰ বাবে চিকিৎসালয় কৰ্তৃপক্ষই পিতৃৰ মৃতদেহ পৰিয়ালৰ লোকৰ ওচৰত চমজাই দিয়া নাই ।
তেওঁৰ মৃত্যুৰ খবৰ পায় অজস্ৰ গুণমুগ্ধৰ লগতে সাংস্কৃতিক জগতৰ কেইবাগৰাকী তাৰকাই শোক প্ৰকাশ কৰে । ছবি নিৰ্মাতা কুনাল কোহলীয়েও টুইটাৰযোগে শোক ব্যক্ত কৰি কয় যে তেওঁৰ মৃত্যুৰ বাতৰিয়ে যথেষ্ঠ মৰ্মাহত কৰিছে । হিন্দী চলচ্চিত্ৰ সংগীতৰ এক গৌৰৱময় অধ্যায়ৰ সমাপ্তি ঘটিল । উল্লেখ্য যে, ৯০ দশকৰ সংগীতজ্ঞ আছিল শ্ৰৱণ ৰাথোড় ।