চিটাৰা ডেস্ক, 3 ছেপ্তেম্বৰ: বৃহস্পতিবাৰে টেলিভিশ্বন জগত তথা বলীউডত শোকৰ ছাঁ পেলাই অজান মুলুকলৈ গুছি গ’ল জনপ্ৰিয় অভিনেতা তথা ৰিয়েলিটি শ্ব’ বিগ বছ-১৩(Bigg Boss-13)ৰ বিজয়ী সিদ্ধাৰ্থ শুক্লা(Sidharth Shukla)৷ মাত্ৰ 40 বছৰ বয়সতে হৃদক্ৰিয়া বন্ধ হৈ মৃত্যু হয় অভিনেতাগৰাকীৰ । সিদ্ধাৰ্থ শুক্লাৰ মৃত্যু শোকস্তব্ধ হৈ পৰিছে অনুৰাগীৰ লগতে বি-টাউনবাসী ।
সিদ্ধাৰ্থৰ মৃত্যুৰ বাতৰিয়ে পলকতে আচম্বিত কৰি তোলে তেওঁৰ পৰিয়াল, অজস্ৰ অনুৰাগী, টেলিভিশ্বন জগত তথা বলীউড তাৰকাসকলক ৷ কিয়নো এইগৰাকী অভিনেতাই অভিনয় আৰু সুন্দৰ ব্যক্তিত্বৰে সকলো দিশতে দখল লাভ কৰিবলৈ সক্ষম হৈছিল ৷ তেওঁৰ এই অকাল মৃত্যুৱে ছ’চিয়েল মিডিয়াত এক ধুমুহা সদৃশ পৰিৱেশৰ সৃষ্টি কৰে ৷
চলমান খান(Salman Khan), অক্ষয় কুমাৰ(Akshay Kumar), অজয় দেৱগন(Ajay Devgn) আৰু মাধুৰী দীক্ষিত নেনেকে(Madhuri Dixit Nene) ধৰি প্ৰায় সংখ্যক বলীউড তাৰকাই সিদ্ধাৰ্থৰ মৃত্যুত শোকবাৰ্তা প্ৰেৰণ কৰে ৷ বিগ বছ 13ৰ ঘোষক অভিনেতা চলমান খানে লিখিছে, বহু সোনকালেই গুচি গ’লা তুমি ৷ তোমাৰ পৰিয়াললৈ গভীৰ সমবেদনা, RIP ৷
সিদ্ধাৰ্থৰ প্ৰথমখন বলীউড ছবি ‘Humpty Sharma Ki Dulhania’ত একেলগে কাম কৰা অভিনেতা বৰুণ ধৱনে(Varun Dhawan) ছ’চিয়েল মিডিয়াযোগে শোকবাৰ্তা প্ৰেৰণ কৰাৰ লগতে সিদ্ধাৰ্থৰ উপস্থিত হৈ তেওঁলৈ জনাইছে একাঁজলি শ্ৰদ্ধাঞ্জলি ৷ ছ’চিয়েল মিডিয়াযোগে বৰুণে লিখিছে, RIP ভাই ৷ তোমাৰ দয়ালু হৃদয় আৰু সুন্দৰ ব্যক্তিত্বই বহুতৰ হৃদয়ত স্পৰ্শ কৰিছিল । আজি স্বৰ্গই এটা তৰা লাভ কৰিছে আৰু আমি তোমাক এটা হেৰুৱাইছো । তোমাৰ পৰিয়াল আৰু প্ৰিয়জনলৈ গভীৰ সমবেদনা ৷
সিদ্ধাৰ্থে অংশগ্ৰহণ কৰা অন্যতম ৰিয়েলিটি শ্ব’ ‘Jhalak Dikhhla Jaa’ বিচাৰক মোহময়ী অভিনেত্ৰী মাধুৰী দীক্ষিত নেনেই(Madhuri Dixit Nene) এসপ্তাহ পূৰ্বে ‘Dance Deewane’ৰ মঞ্চতো লগ পাইছিল সিদ্ধাৰ্থক ৷ সিদ্ধাৰ্থৰ মৃত্যুত আচম্বিত হৈ তেওঁ লিখিছে, এয়া অবিশ্বাস্য আৰু আচৰিত । তোমাক সদায় স্মৰণ কৰিম । তোমাৰ আত্মাই চিৰশান্তি লাভ কৰক । তোমাৰ পৰিয়াললৈ আন্তৰিক সমবেদনা ৷