ভাৰতৰ শোচনীয় পৰাজয়কলৈ অনুষ্কা শৰ্মাক তীব্ৰ সমালোচনা

ভাৰত-অষ্ট্ৰেলিয়াৰ মাজৰ ৪ দিনীয়া শৃংখলাৰ প্ৰথমখন টেষ্ট মেছত ভাৰত পৰাস্ত হোৱাৰ পিছতে টুইটাৰত তীব্ৰ সমালোচনাৰ সন্মুখীন হ'বলগীয়া হৈছে অভিনেত্ৰী অনুষ্কা শৰ্মা । ভাৰতৰ শোচনীয় পৰাজয়ৰ বাবে একাংশই দোষাৰোপ কৰিছে অভিনেত্ৰীগৰাকীক । ভাৰতৰ ক্ৰিকেট দলে খেলপথাৰত পুতৌজনক প্ৰদৰ্শন কৰিলে কিয় বাৰে বাৰে অভিনেত্ৰীগৰাকীক সমালোচনা কৰা হয় বুলিও প্ৰশ্ন উত্থাপন কৰিছে আন একাংশই ।

চিটাৰা ডেস্ক, ১৯ ডিচেম্বৰ: পুনৰ ছ'চিয়েল মিডিয়াত সমালোচনাৰ সন্মুখীন হ'বলগীয়া হৈছে অভিনেত্ৰী তথা ছবি নিৰ্মাতা অনুষ্কা শৰ্মাই । কিয়নো, এডেলেইড খেল পথাৰত অনুষ্ঠিত ভাৰত-অষ্ট্ৰেলিয়াৰ মাজৰ ৪ দিনীয়া শৃংখলাৰ প্ৰথমখন টেষ্ট মেছত ভাৰতীয় দলে ৩৬ ৰাণ সংগ্ৰহ কৰিয়েই পেভিলিয়নলৈ উভতিবলগীয়া হয় । দলটোৰ শোচনীয় প্ৰদৰ্শনৰ পিছত ছ'চিয়েল মিডিয়াত তীব্ৰ সমালোচনাৰ সন্মুখীন হৈছে অধিনায়ক বিৰাট কোহলিৰ পত্নী অনুষ্কা শৰ্মা ।

স্বামীৰ সৈতে থাকি প্ৰথমটো সন্তান জন্ম দিয়াৰ আশা কৰি থকা অনুষ্কাক এনেদৰে ভাৰতীয় দলৰ পৰাজয়ৰ বাবে দোষাৰোপ কৰাতো যুক্তিসংগত নহয় বুলিও একাংশই মতামত আগবঢ়াইছে । টুইটাৰত ইতিমধ্যে একাংশ লোকৰ ককৰ্থনাৰ সন্মুখীন হৈছে অনুষ্কা । লগতে সমালোচনা কৰা হৈছে মহেন্দ্ৰ সিং ধোনী আৰু ৰোহিত শৰ্মাক । ভাৰতৰ পুতৌজনক প্ৰদৰ্শনৰ বাবে তিনিওকে জগৰীয়া কৰি ক্ষোভ উজাৰিছে একাংশই । লগতে বিৰাট কোহলিয়ে পেটাৰ্নীটি লিভ লোৱাক লৈও একাংশই সমালোচনা কৰিছে ।

কিয়নো, প্ৰাক্তন অধিনায়কে পৰিয়ালৰ বিপদৰ সময়তো ৰাষ্ট্ৰীয় কৰ্তব্য পালন কৰা উদাহৰণ আছে । ইয়াৰ বিপৰীতে আন একাংশই অনুষ্কাক বাৰে বাৰে ভাৰতীয় দলৰ পৰাজয়ৰ বাবে দোষাৰোপ কৰাক লৈ অসন্তুষ্টি প্ৰকাশ কৰে । কিয় অভিনেত্ৰীগৰাকীক জগৰীয়া কৰা হৈছে বুলিও প্ৰশ্ন উত্থাপন কৰে । উল্লেখ্য যে, অহা জানুৱাৰী মাহত অনুষ্কাই সন্তান প্ৰসৱ কৰাৰ সম্ভাৱনা আছে । যোৱা আগষ্ট মাহত বিৰুষ্কাই এই খবৰটো ৰাজহুৱা কৰিছিল ।

লগতে পঢ়ক:কৃষকক সমৰ্থনৰ আঁৰৰ অভিপ্ৰায় সন্দৰ্ভত প্ৰিয়ংকা,দিলজীতক প্ৰশ্ন কংগনাৰ