অসম আৰু বিহাৰৰ বানাক্ৰান্তলৈ বিৰাট-অনুষ্কাৰ সাহাৰ্য

ভাৰতৰ জনপ্ৰিয় অভিনেত্ৰী অনুষ্কা শৰ্মা আৰু জনপ্ৰিয় ক্ৰিকেটাৰ বিৰাট কোহলীয়ে অসম আৰু বিহাৰৰ বানাক্ৰান্তৰ প্ৰতি সুহৃদয়তা প্ৰকাশ কৰি অনুদান আগবঢ়াইছে আৰু লগতে আনকো অনুদান আগবঢ়াবৰ বাবে অনুৰোধ কৰিছে ৷

চিটাৰা ডেস্ক,30 জুলাইঃ অতি জনপ্ৰিয় তাৰকা দম্পতী বিৰাট কোহলী আৰু অনুষ্কা শৰ্মাই শেহতীয়াকৈ অনুদান আগবঢ়ালে অসম আৰু বিহাৰৰ বানাক্ৰান্ত সকললৈ ৷ কেৱল অনুদান আগবঢ়োৱাই নহয় আনকো অনুদান আগবঢ়াবৰ বাবে অনুৰোধ জনাইছে তাৰকা দম্পতীয়ে ৷

দুয়োৱে নিজৰ ইনষ্টাগ্ৰাম একাউন্ট যোগে প'ষ্ট শ্বেয়াৰ কৰি লিখিছে যে যেতিয়া দেশে কৰ'ণা মহামাৰীৰ সৈতে যুঁজি আছে ৷ সেই সময়ত অসম আৰু বিহাৰৰ মানুহৰ জীৱন বিপন্ন কৰিছে প্ৰলয়ংকাৰী বানে ৷ দুয়োৱে অসম আৰু বিহাৰৰ মানুহৰ বাবে প্ৰাৰ্থনা কৰাৰ লগতে তিনিটা সাহাৰ্য প্ৰদানকাৰী সংগঠনক সহযোগ কৰি অনুদান আগবঢ়াইছে ৷ তেওঁলোকে নিজে বানাক্ৰান্তক সহায় কৰাৰ লগতে আনকো এনে কৰিবলৈ উদ্বুদ্ধ কৰা পৰিলক্ষিত হৈছে ৷

জনপ্ৰিয় অভিনেত্ৰী অনুষ্কা শৰ্মা আৰু জনপ্ৰিয় ক্ৰিকেটাৰ বিৰাট কোহলী

এই তাৰকা দম্পতীয়ে সদায় নিজৰ প্ৰতিভা আৰু কামৰ বাবে জনমানসত জনপ্ৰিয় হৈ আহিছে ৷ বানাক্ৰান্তৰ প্ৰতি তেওঁলোকৰ এই সহমৰ্মিতাই পুনৰ আপ্লুত কৰিছে দুয়োৰে অনুৰাগীসকলক ৷

এইখিনিতে জনাই থওঁ যে, বান তথ্য অনুসৰি বৰ্তমানলৈকে অসমৰ 5,305 খন গাঁও আৰু 5,671,209 গৰাকী লোক বানৰ ফলত প্ৰভাৱিত হৈছে ৷ লগতে বিহাৰৰ 3,847,531 জন লোক বানৰ দ্বাৰা প্ৰভাৱিত হৈছে ৷

লগতে পঢ়কঃবাহুবলীৰ পৰিচালক এচ এচ ৰাজামৌলিৰ দেহত কোভিড-১৯ পজিটিভ