ঐশ্বৰ্য, আৰাধ্যা আৰু জয়া বচ্চন কৰ'ণা নিগেটিভ

মেগাষ্টাৰ অমিতাভ বচ্চন আৰু তেওঁৰ পুত্ৰ অভিষেক বচ্চনৰ শৰীৰত শনিবাৰে ধৰা পৰিল কৰ'ণাৰ অৱস্থিতি ৷ মেগাষ্টাৰগৰাকী কৰ'ণাত আক্ৰান্ত হোৱাৰ খবৰ অহাৰ পিছতেই সম্পূৰ্ণ পৰিয়ালৰে COVID পৰীক্ষণ কৰা হয় ৷ পুত্ৰ অভিষেক বচ্চনৰো কৰ'ণা পজিটিভ পোৱাৰ পিছত দেওবাৰে ফলাফল আহিল পত্নী জয়া বচ্চন,বোৱাৰী ঐশ্বৰ্য ৰায় বচ্চন আৰু নাতিনী আৰাধ্যা বচ্চনৰ ৷ তিনিওগৰাকীৰে ফলাফল নিগেটিভ অহাত কিছু সকাহ অনুভৱ কৰিছে অনুৰাগীয়ে ৷

চিটাৰা ডেস্ক,12 জুলাইঃবলীউডৰ মহানায়ক অমিতাভ বচ্চনো সাৰি নগ'ল মহামাৰী কৰ'ণাৰ প্ৰভাৱৰ পৰা ৷ শনিবাৰে অহা এক খবৰ অনুসৰি মেগাষ্টাৰ গৰাকী আক্ৰান্ত COVID-19 ৰোগত ৷ তাৰকা গৰাকী কৰ'ণাত আক্ৰান্ত হোৱাৰ খবৰ পিছতেই COVID পৰীক্ষণ কৰা হ'ল সমগ্ৰ পৰিয়ালটোৰ ৷ পৰীক্ষণত পুত্ৰ অভিষেক বচ্চনৰো ফলাফল পজিটিভ আহিল ৷

কিন্তু তাৰ মাজতে দেওবাৰে ৰি'পৰ্ট আহিল ঐশ্বৰ্য, আৰাধ্যা আৰু জয়া বচ্চনৰ ৷ পৰীক্ষণত তিনিওগৰাকীৰে ফলাফল নিগেটিভ আহিল ৷

জানিব পৰা মতে, মেগাষ্টাৰগৰাকীয়ে শনিবাৰে উশাহ লোৱাত কষ্ট অনুভৱ কৰিছিল,সেয়ে তেওঁক লৈ যোৱা হৈছিল হাস্পতাললৈ ৷ আৰু তাৰ পিছতে হাস্পতালত তেওঁৰ COVID পৰীক্ষণ কৰা হয় আৰু এই পৰীক্ষণৰ ফলাফল পজিটিভ আহে ৷

এই খবৰ নিজেই টুইট যোগে প্ৰকাশ কৰে বিগ বি অমিতাভ বচ্চনে ৷ জনাই থওঁ যে দুয়োগৰাকী তাৰকা পিতা-পুত্ৰক ভৰ্তি কৰা হয় মুম্বাইৰ নানাৱতী হাস্পতালত ৷

অভিষেক বচ্চনৰ ডিজিটলে চিৰিজ ব্ৰীড ইনটু দ্য চেড'জ মুক্তি লাভ কৰিছিল 10 জুলাই তাৰিখে ৷ এই চিৰিজটো ডাবিং কৰাৰ বাবে বিগত কিছু দিনৰ পৰা ষ্টুডিঅ'লৈ অহা-যোৱা কৰি আছিল অভিনেতাগৰাকীয়ে ৷

অমিতাভ আৰু অভিষেক বচ্চনৰ কৰ'ণা সংক্ৰমণৰ বিষয়ে সকলোৱে জনাৰ পিছত অনুৰাগীসকলৰ লগতে বলীউডৰ তাৰকাসকলে নিজৰ মতামতৰ লগতে দুয়োৰে আশু আৰোগ্য কামনা কৰিছে ছ'চিয়েল মিডিয়া যোগে ৷

লগতে পঢ়কঃবিগ বি অমিতাভ বচ্চন আৰু পুত্ৰ অভিষেক বচ্চন কোভিড-19ত আক্ৰান্ত