উৰিষ্যা, 17 এপ্ৰিলঃ দ্বিতীয় পৰ্যায়ৰ নিৰ্বাচনৰ আগেয়ে উৰিষ্যাৰ কান্ধামাল জিলাত অঘটন ৷ নিৰ্বাচনী বিষয়াৰ কৰ্মীসকলক লৈ ভোটগ্ৰহণ কেন্দ্ৰলৈ গৈ থাকোতেই মাওবাদীয়ে গুলীয়াই হত্যা কৰে এগৰাকী মহিলা প'লিং বিষয়াক ৷ নিহত বিষয়াগৰাকী চেক্টৰ অফিচাৰ সংযুক্তা দিগল বুলি জানিব পৰা গৈছে ৷
আৰক্ষী সঞ্চালক প্ৰধান বি কে শৰ্মাই প্ৰকাশ কৰা অনুসৰি, জংঘলৰ মাজেৰে গৈ থাকোতে বিষয়াসকলে দেখা পাইছিল ৰাস্তাৰ মাজত পৰি থকা এক সন্দেহজনক সামগ্ৰী ৷ সামগ্ৰীবিধ চাবলৈ বুলি চেক্টৰ বিষয়া সংযুক্তা দিগল বাহনৰ পৰা নামি যাওঁতেই মাওবাদীয়ে তেওঁক লক্ষ্য কৰি গুলীচালনা কৰে ৷ মাওবাদীৰ আক্ৰমণত থিতাতে নিহত হয় প'লিং বিষয়াগৰাকী ৷ লগতে, এই আক্ৰমণত বাহনখনত থকা আন বিষয়াসকল হতাহত হোৱা নাই বুলিও প্ৰকাশ কৰে আৰক্ষী সঞ্চালক প্ৰধানগৰাকীয়ে ৷
