টিংখাঙত ফেচবুকত প্ৰেমত পৰি প্ৰতাৰিত যুৱতী

টিংখাঙত ফেচবুক প্ৰেমত পৰি প্ৰতাৰিত যুৱতী । মাত্ৰ ১০ দিনীয়া ফেচবুক প্ৰেমে জীৱনলৈ অমানিশা কঢ়িয়াই আনিলে টিংখাঙৰ এগৰাকী যুৱতীৰ ।

টিংখাং,8ছেপ্টেম্বৰঃযুগৰ পৰিবৰ্তন হোৱাৰ লগে লগে ডিজিটেলাইজ হৈছে আমাৰ দৈনিক জীৱন ৷ সমান্তৰালকৈ যুগৰ লগত মিলাই প্ৰেমকো ডিজিটেলাইজ কৰিছে একাংশ ব্যস্ত লোকে ৷ কিন্তু তাৰ পৰিণতি কিমান ভয়াৱহ হ'ব পাৰে সেয়া সকলোৱে জ্ঞাত ৷ তেনে এক ঘটনাই পোহৰলৈ আহিছে ডিব্ৰুগড়ৰ টিংখাঙত ৷ মাত্ৰ ১০ দিনীয়া ফেচবুক প্ৰেমে জীৱনলৈ অমানিশা কঢ়িয়াই আনিলে টিংখাঙৰ এগৰাকী যুৱতীৰ। টিংখাং আৰক্ষী থানাৰ অন্তৰ্গত ১ নং পোৱালি পথাৰ গাঁৱৰ যুৱতী গৰাকীয়ে ফেচবুকত চিনাকি হৈছিল শিৱসাগৰ ডিমৌৰ ৰাজু গগৈ ওৰফে নিতুল গগৈ নামৰ যুৱকজনৰ সৈতে । নিজকে গুৱাহাটীত আৰক্ষীত কৰ্মৰত বুলি পৰিচয় দিয়া যুৱকজনে যুৱতী গৰাকীৰ সৈতে প্ৰেমৰ অভিনয় কৰিছিল ফেচবুকত । ইপিনে যোৱা ২৬ আগষ্টত প্ৰেমিক ৰাজুৱে যুৱতী গৰাকীক লগ কৰিবলৈ টিংখাঙলৈ আহি ভয়-ভাবুকিৰে যুৱতীগৰাকীক নিজৰ লগত লৈ যায় । প্ৰথমে দুয়ো ৰাজগড়ৰ পৰা বাছেৰে দুলিয়াজানলৈ যায় ৷ তাৰ পাছত ৰে'লেৰে যুৱতী গৰাকীক ডিমাপুৰলৈ নি তাত এখন হোটেলত আৱদ্ধ কৰি ৰাখে । ইতিমধ্যে লম্পট প্ৰেমিকে প্ৰেমিকাৰ গাৰ সকলো সোনৰ অলংকাৰ বিক্ৰী কৰে । ইফালে যুৱতী গৰাকীয়ে ৰাজু ওৰফে নিতুলক তেওঁৰ ঘৰলৈ নিবলৈ জোৰ কৰাত শু‌কুৰবাৰে যুৱকজনে যুৱতী গৰাকীক নিজৰ ঘৰলৈ ৰে'লেৰে আনি নাহৰকটীয়া ৰে'ল ষ্টেচনত কিছু সময় অপেক্ষা কৰিবলৈ কৈ অন্তৰ্ধান হয় । পাচত অসহায় যুৱতী গৰাকীয়ে নাহৰকটীয়া আৰক্ষী থানাত উপস্থিত হৈ সবিশেষ অৱগত কৰে । ইতিমধ্যে যুৱতী গৰাকীৰ পৰিয়ালে ঘটনা সন্দৰ্ভত টিংখাং আৰক্ষী থানাত এজাহাৰ দাখিল কৰিছে ।

আনহাতে শুকুৰবাৰে দিনত টিংখাং ক্ষুদ্ৰ প্ৰাথমিক স্বাস্থ্য কেন্দ্ৰলৈ যোৱাৰ পথৰ পৰাই দিল্লীবাৰী গাঁও পঞ্চায়তৰ অন্তৰ্গত বচা গাঁৱৰ পৰা বোৱাৰী সন্ধানহীন হৈ আছে। এটা সন্তানৰ মাতৃ বোৱাৰী গৰাকীকো অভিযুক্ত ৰাজু গগৈয়ে কৌশলেৰে পলোৱাই নিয়া বুলি সন্দেহ প্ৰকাশ কৰিছে পৰিয়ালৰ লোকে ।