যোৰহাটত হাইটেক চোৰৰ সন্ত্ৰাস, আটক 2

শুকুৰবাৰে যোৰহাট আৰক্ষীয়ে আটক কৰে 2 টাকৈ হাইটেক চোৰ ৷ এগৰাকী যুৱতীৰ এটিএম কাৰ্ড চুৰি কৰি নিওতেই আৰক্ষীৰ হাতত আটক হয় ক্ৰমে হাৰিয়ানাৰ চানী কুমাৰ আৰু অশোক কুমাৰ ৷ ধৃত লোক দুজনক আটক কৰি তদন্ত আৰম্ভ কৰিছে যোৰহাট আৰক্ষীয়ে ৷

যোৰহাট,3মে': শুকুৰবাৰে যোৰহাট আৰক্ষীৰ জালত পৰিল 2 টাকৈ হাৰিয়ানাৰ চোৰ ৷ যোৰহাটৰ বৰুৱা চাৰিআলিস্থিত এটিএমৰ পৰা এগৰাকী যুৱতীয়ে ধন উলিওৱাৰ সময়তে এজন যুৱকে সহায় কৰাৰ চলেৰে যুৱতীৰ এটিএম কাৰ্ড কাঢ়ি নিয়ে । পাচত যুৱতী গৰাকীয়ে চিঞৰ বাখৰ কৰাত এজন ব্যক্তিয়ে আৰক্ষীক অৱগত কৰাত আৰক্ষীয়ে চহৰখনত কৰ্মৰত আৰক্ষীক বাতৰিটো বিয়পাই দিয়ে ৷ যাৰ পৰৱৰ্তী সময়ত চহৰখনৰ নিৰ্মল চাৰিআলিৰ সমীপত এখন মাৰুটি চুইফ্ট গাড়ীসহ দুজন লোকক আৰক্ষীয়ে আটক কৰে । উল্লেখ্য যে সুদূৰ হাৰিয়ানাৰ পৰা বিলাসী বাহন ভাড়ালৈ লৈ এইদৰে লোকদুজনে চুৰিকাৰ্য সংঘটিত কৰাৰ চেষ্টা কৰিছিল ৷ আৰক্ষীয়ে ধৃত লোক দুজন ক্ৰমে চানী কুমাৰ আৰু অশোক কুমাৰ বুলি জানিবলৈ দিয়ে । ইতিমধ্যে আৰক্ষীয়ে ধৃতলোক দুজন পৰা এটা ছুইফ মেছিন, লেপটপ, নগধ ৫৬,২৪০ টকাৰ লগতে ১০ খন বিভিন্ন বেংকৰ এটিএম কাৰ্ড উদ্ধাৰ কৰিছে । আনহাতে এই ঘটনাৰ লগত আৰু অধিক লোক জড়িত থকাৰ সন্দেহ প্ৰকাশ কৰি তদন্ত অব্যাহত ৰাখিছে যোৰহাট আৰক্ষীয়ে ।