পাৰিবাৰিক সংঘাতৰ বাবেই হত্যা মাতৃ-ভাতৃক

প্ৰথমে মাতৃ-ভাতৃক হত্যা, তাৰ পাচত পত্নীক লৈ পলায়ন ৷ কিয় বাবলুৱে হত্যা কৰিলে সহোদৰ আৰু জন্মদাতৃক !

টিংখাং, 25 নৱেম্বৰঃদেওবাৰে নিশা ডিব্ৰুগড়ৰ জিলাৰ টিংখাংস্থিত কাকৱনী ব্লক গাঁৱত সংঘটিত হয় এটা নৃশংস হত্যাকাণ্ড ৷ একেটা পৰিয়ালৰে এজন সদস্যই চোকা অস্ত্ৰৰে আক্ৰমণ কৰি নিৰ্মমভাৱে হত্যা কৰে মাক আৰু ভায়েকক ৷

প্ৰাপ্ত তথ্য অনুসৰি দেওবাৰে নিশা উক্ত পৰিয়ালটোৰ বাসগৃহত পাৰিবাৰিক কন্দলৰ সৃষ্টি হৈছিল ৷ যাৰ পৰিণতিত বাবলু মাঝি নামৰ লোক জনে তেওঁৰ মাতৃ আশামণি মাঝি আৰু ভাতৃ বিজয় মাঝিক চোকা অস্ত্ৰৰে আক্ৰমণ চলায় ৷ চোকা অস্ত্ৰৰে প্ৰহাৰ কৰাৰ বাবে ঘটনাস্থলীতে মৃত্যু হয় মাতৃ-পুত্ৰৰ ৷

ইপিনে এই ঘটনা সংঘটিত কৰিয়েই অভিযুক্ত বাবলু মাঝিয়ে তেওঁৰ পত্নীৰ সৈতে পলায়ন কৰে ৷ সম্প্ৰতি ঘটনাস্থলীত ৰাজগড় আৰক্ষী থানাৰ এটা দল উপস্থিত হৈ সমগ্ৰ ঘটনাৰ তদন্ত অব্যাহত ৰাখিছে ৷

লগতে পঢ়ক :ডিগবৈত শোকাবহ পথ দুৰ্ঘটনা : নিহত চাৰি