নিৰ্দোষীৰ ওপৰত চলোৱা বৰ্বৰ আক্ৰমণে কাৰ কি লাভ কৰিছেঃ বিস্ফোৰণত আহত

জু-ৰ'ডৰ গ্ৰেণেড বিস্ফোৰণত আহত পৰিয়ালৰ প্ৰতিক্ৰিয়া ৷ গ্ৰেণেড বিস্ফোৰণত জড়িতক কঠোৰ শাস্তি প্ৰদানৰ দাবী ভুক্তভুগীৰ

গোলাঘাট, 16 মে': গুৱাহাটীৰ জু ৰ'ডত বুধবাৰে সংঘটিত গ্ৰেণেড বিস্ফোৰণত গুৰুতৰভাৱে আহত গোলাঘাটৰ এজন যুৱক । সন্ত্ৰাসবাদীৰ এনে কাৰ্যত ক্ষোভ উজাৰিলে আহত ফাৰদ্দিন হাছানিয়ান ৰহমানৰ পৰিয়ালে । নিৰ্দোষীৰ ওপৰত চলোৱা এই বৰ্বৰ আক্ৰমণে কাৰ কি লাভ কৰিছে বুলি প্ৰশ্ন ভুক্তভুগীৰ ৷ গোলাঘাট কুমাৰপট্ৰিৰ বাসিন্দা চুলতান জাহিদুৰ ৰহমানৰ পুত্ৰ ফাৰদ্দিন বৰ্তমান গুৱাহাটী চিকিৎসা মহাবিদ্যালয়ত চিকিৎসাধীন হৈ আছে ।

উল্লেখ্য যে, চুলতান জাহিদুৰৰ কনিষ্ঠ পুত্ৰ এলভিৰ ৰহমানক বেডমিণ্টন প্ৰতিযোগিতাত অংশ ল'বলৈ গুৱাহাটীলৈ লৈ গৈছিল পিতৃয়ে । বুধবাৰে ঘোষিত হাইস্কুল শিক্ষান্ত পৰীক্ষাত উত্তীৰ্ণ হৈছিল এলভিৰ ৰহমান । ফলাফলত সন্তুষ্ট হৈয়ে পিতৃ চুলতান জাহিদুৰ আৰু পুত্ৰ ফাৰদ্দিন বিয়লি গৈছিল বজাৰ কৰিবলৈ। তেতিয়াই সংঘটিত হয় এই ভয়াৱহ ঘটনাটো । ঘটনাত গুৰুতৰভাৱে আহত হৈ চিকিৎসাধীন হৈ আছে ফাৰদ্দিন হাছানিয়ান ৰহমান ।