এএম পেলেচ হোটেলৰ সন্মুখত উদ্ধাৰ মানসিক বিকাৰগ্ৰস্তৰ মৃতদেহ

নগাঁৱত এখন মালবাহী বাহনৰ পৰা উদ্ধাৰ হয় এটা মৃতদেহ ৷ মৃতদেহটো মানসিকভাৱে বিকাৰগ্ৰস্ত এগৰাকী লোকৰ বুলি জানিব পৰা গৈছে ৷

নগাঁও, 14 জুলাই : মৃতদেহ উদ্ধাৰক লৈ নগাঁৱত চাঞ্চল্য ৷ জিলাখনৰ এলফিষ্টন চাৰিআলিত উদ্ধাৰ হয় এটা মৃতদেহ ৷ এখন ৰখাই থোৱা বাহনৰ পৰা উদ্ধাৰ হয় মানসিকভাৱে বিকাৰগ্ৰস্ত এগৰাকী ব্যক্তিৰ মৃতদেহ ৷

এলফিষ্টন চাৰিআলিৰ হোটেল এএম পেলেচৰ সন্মুখত ৰখাই অৱস্থাত উদ্ধাৰ হয় মানিক দে' নামৰ ব্যক্তিগৰাকীৰ মৃতদেহ ৷ মানসিকভাৱে বিকাৰগ্ৰস্ত মানিক দে', বিগত শুকুৰবাৰৰ পৰা নিখোজ হৈ আছিল ৷ ঘটনা সন্দৰ্ভত পৰিয়ালৰ লোকে ইটাচালি আৰক্ষী চকীত এক এজাহাৰো দাখিল কৰিছিল ৷

অৱশেষত মঙলবাৰে এইদৰে হোটেলৰ সন্মুখত ৰখাই থোৱা মালবাহী বাহনৰ পৰা উদ্ধাৰ হয় নিখোজ হৈ থকা মানিক দে'ৰ মৃতদেহ ৷ ইতিমধ্যে আৰক্ষীয়ে মৃতদেহটো উদ্ধাৰ কৰি মৰনোত্তৰ পৰীক্ষাৰ বাবে প্ৰেৰণ কৰিছে আৰু ঘটনা সন্দৰ্ভত তদন্ত অব্যাহত ৰাখিছে ৷

লগতে পঢ়কঃকাজিৰঙাৰ সোনালী বাঘক লৈ নতুন বিতৰ্ক !