হোজাইত মহিলাৰ অৰ্ধগলিত মৃতদেহ উদ্ধাৰ

শনিবাৰে সন্ধিয়া বন্ধ কোঠাৰ ভিতৰত ওলোৱা মহিলাৰ অৰ্ধগলিত মৃতদেহক লৈ চাঞ্চল্য নীলবাগানত ৷ উদ্ধাৰ হোৱা মৃতদেহটোৰ পৰিচয় ওলোৱা নাই বৰ্তমানলৈকে ৷

হোজাই. 25 আগষ্টঃ চৌদিশে কেৱল দুৰ্গন্ধ ৷ দুৰ্গন্ধই ছানি ধৰিছে নীলবাগানৰ এটা অঞ্চল ৷ এই দুৰ্গন্ধৰ উৎস বিচাৰি অৱশেষত ৰাইজে নীলবাগান সাপ্তাহিক বজাৰৰ বন্ধ হৈ থকা এটা কোঠালীৰ পৰা শনিবাৰে সন্ধিয়া উদ্ধাৰ কৰে এগৰাকী মহিলাৰ অৰ্ধগলিত মৃতদেহ ৷ কোঠালীৰ এখন বিচনাৰ তলত পৰি আছে ক্ষত বিক্ষত মৃতদেহটো ৷ উদ্ধাৰ হোৱা মৃতদেহটোৰ পৰিচয় ওলোৱা নাই বৰ্তমানলৈকে ৷

মৃতদেহ উদ্ধাৰ হোৱা কোঠালীটো চাইম উদ্দিন নামৰ লোকজনৰ ৷ লোকজনে তেওঁৰ চালকক ভাড়ালৈ দিছিল কোঠালীটো ৷ এসপ্তাহৰ পূৰ্বৰ পৰাই অন্তৰ্ধান হৈ আছে চালকজন ৷ কোনো লোকে ধৰ্ষণ কৰি মহিলাগৰাকীক হত্যা কৰাৰ সন্দেহ কৰিছে স্থানীয় লোকে ৷ চালকজন নিখোজ হৈ থকাত চালকজনেই এই কাণ্ড সংঘটিত কৰিব পাৰে বুলিও চৰ্চিত হৈছে আন একাংশৰ মাজত ৷ অৱশেষত আৰক্ষীক খবৰ দিয়াত আৰক্ষীয়ে মৃতদেহটো উদ্ধাৰ কৰি তদন্ত আৰম্ভ কৰিছে ৷