গোলাঘাটত সোপাধৰাৰ সন্দেহঃ ৰাইজৰ ৰোষত পৰিল এজন

গোলাঘাট নুমলীগড় চাহ বাগিচাত সোপাধৰাৰ আতংক । নিশা হাতে হাতে দা ,লাঠী লৈ ওলাই আহিল শ শ শ্ৰমিক । পৰিস্থিতি নিয়ন্ত্ৰণৰ বাবে আৰক্ষীৰ লাঠী চালনা

গোলাঘাট,১৯ জুনঃ গোলাঘাট নুমলীগড় চাহ বাগিচাত মঙলবাৰে নিশা এজন অচিনাক্ত লোক বাগিচাখনৰ এজন লোকৰ ঘৰত প্ৰৱেশ কৰা ঘটনাক কেন্দ্ৰ কৰি অঞ্চলটোত সৃষ্টি হৈছে উত্তপ্ত পৰিস্থিতি । বাগিচাৰ শ্ৰমিক সকলে লোকজনক সোপাধৰা বুলি সন্দেহ কৰি হাতে হাতে দা, লাঠী লৈ ওলাই আহে শ শ শ্ৰমিক । ঘটনাৰ খবৰ পাই ঘটনাস্থলীত আৰক্ষী আৰু অৰ্ধ সামৰিক বাহিনী উপস্থিত হৈ পৰিস্থিতি নিয়ন্ত্ৰণ কৰাৰ চেষ্টা কৰে । কিন্তু আৰক্ষী উপস্থিত হোৱাৰ পিচত অধিক উত্তপ্ত হৈ পৰে বাগিচা খনৰ শ্ৰমিক সকল । সোপাধৰাৰ সন্দেহ কৰা লোক জনক আবদ্ধ কৰি ৰাখে বাগিচাখনৰ কাৰ্যালয়ত । লোক জনক উদ্ধাৰ কৰাত আৰক্ষীক বাধা প্ৰদান কৰে উত্তেজিত শ্ৰমিক সকলে আৰু আৰক্ষীকে আক্ৰমণৰ লক্ষ্য কৰে একাংশ শ্ৰমিকে ।

উত্তেজিত শ্ৰমিকে শিল আৰু ইটাৰে আক্ৰমণ কৰে আৰক্ষীক । পৰিস্থিতি অধিক অৱনতি হোৱাত আৰক্ষীয়ে পৰিস্থিতি নিয়ন্ত্ৰণৰ বাবে লাঠী চালনা কৰে আৰু সমগ্ৰ ঘটনাটোত এজন আৰক্ষী বিষয়া আহত হয় । শেষত বহু চেষ্টাৰ অন্তত আৰক্ষী আৰু অৰ্ধ সামৰিক বাহিনীয়ে ঘটনাস্থলীৰ পৰা উদ্ধাৰ কৰে সোপাধৰা সন্দেহ কৰা লোকজনক । বৰ্তমান লোকজনক আটক কৰি অব্যাহত ৰাখিছে তদন্ত । বৰ্তমান পৰ্যন্ত লোকজনৰ সঠিক পৰিচয় জানিব পৰা নাই আৰক্ষীয়ে ৷

লগতে পঢ়কঃ জাগুনত পথ দুৰ্ঘটনাঃ আহত 2