106 টা চোৰাং গৰুসহ বিএছএফৰ জালত গৰু সৰবৰাহকাৰী

ভাৰত-বাংলা সীমান্তত বিএছএফৰ অভিযানত চোৰাং গৰুসহ জাল পৰে এগৰাকী সৰবৰাহকাৰী ৷ ধুবুৰী-দক্ষিণ শালমৰাৰ ভাৰত-বাংলাদেশ সীমান্তত বিএছএফে চলাইছিল এই অভিযান ৷

আজাৰা, 23 জানুৱাৰী : 106 টা চোৰাং গৰুসহ বিএছএফৰ জালত গৰু সৰবৰাহকাৰী । 70 টা গৰু সৰবৰাহ কৰি থকাৰ সময়তে হাতে লোটে ধৰা পৰে গৰু সৰবৰাহকাৰী । ঘটনা অনুসৰি গুৱাহাটী ফ্ৰণ্টিয়াৰ বিএছএফৰ এটি বিশেষ দলে মাজনিশা অভিযান চলাই ভাৰতৰ পৰা বাংলাদেশলৈ 70 টা গৰু ভুটভুটিযোগে সৰবৰাহ কৰি থকাৰ সময়তে ধুবুৰীৰ দক্ষিণ শালমৰাত উদ্ধাৰ কৰিবলৈ সক্ষম হয় । গৰুকেইটাক সৰবৰাহ কৰা ছাহিনুৰ ইছলামকো বিএছএফে এই অভিযানত আটক কৰে । একে সময়তে বিএছএফে সমীপৱৰ্তী এলেকাত অভিযান চলাই পুনৰ 36 টা গৰু উদ্ধাৰ কৰে । গুৱাহাটী বিএছএফে উদ্ধাৰ হোৱা গৰুসহ সৰবৰাহকাৰীজনক দক্ষিণ শালমৰা আৰক্ষী চকীত গোটাই দিয়ে বুলি গুৱাহাটী ফ্ৰণ্টিয়াৰ বিএছএফে সদৰি কৰে । উল্লেখ্য যে পূৰ্বতেও বিএছএফে এনেদৰে অভিযান চলাই বহুতো গৰুসহ সৰবৰাহকাৰীক আটক কৰিবলৈ সক্ষম হৈছে ৷

লগতে পঢ়ক :উজান বজাৰত 'গৰু' চাবলৈ ৰাইজৰ ভিৰ