ইণ্টাৰনেশ্যনেল ডেস্ক,২১ ডিচেম্বৰ :বেদখলকলৈয়ে ইজৰাইল আৰু পেলেষ্টাইনৰ মাজত বহু বছৰ ধৰি সংঘাত চলি আছিল । কিন্তু ২০২৩ চনটো এই সংঘাতৰ আটাইতকৈ ভয়ংকৰ পৰিণাম আছিল । দ্বিতীয় বিশ্বযুদ্ধৰ পাছত ভয়ংকৰ গণহত্যাৰ সাক্ষী হৈছিল সমগ্ৰ বিশ্ব । গাজা ষ্ট্ৰিপক 'পৃথিৱীৰ সৰ্ববৃহৎ মুকলি কাৰাগাৰ' বুলি জনা যায় । পৃথিৱীৰ আটাইতকৈ ঘন বসতিপূৰ্ণ স্থানবোৰৰ ভিতৰত অন্যতম এই গাজা ষ্ট্ৰিপ । ইয়াৰ দৈৰ্ঘ্য মাত্ৰ ৪১ কিলোমিটাৰ আৰু বহল ৬ ৰ পৰা ১২ কিলোমিটাৰ । য'ত প্ৰায় ২০ লাখ লোকে বাস কৰে ।
৭ অক্টোবৰত গাজা ষ্ট্ৰিপৰ শাসকীয় হামাছে ইজৰাইলৰ ওপৰত এক অভূতপূৰ্ব আকস্মিক আক্ৰমণ চলাইছিল । হামাছ সন্ত্ৰাসবাদীসকলে দক্ষিণ ইজৰাইলত প্ৰৱেশ কৰিছিল আৰু ধ্বংসলীলা চলাইছিল । একাংশ সশস্ত্ৰ হামাছ কৰ্মীয়ে মটৰ চাইকেলেৰে ইজৰাইলত প্ৰৱেশ কৰিছিল আৰু সৰু চহৰবোৰত বহু লোকক হত্যা কৰিছিল । ভিডিঅ' ফুটেজত দেখা গৈছিল যে তেওঁলোকে ইজৰাইলী নাগৰিকসকলক অপহৰণ কৰি লৈ গৈছিল আৰু তেওঁলোকক গাজা সীমান্তৰ সিপাৰলৈ লৈ যোৱা হৈছিল । পৰৱৰ্তী সময়ত জনা গৈছিল যে হামাছে প্ৰায় ২৪০ গৰাকী লোকক অপহৰণ কৰি লৈ গৈছিল । ইজৰাইলৰ প্ৰতিবেদন অনুসৰি, এই আক্ৰমণৰ ফলত প্ৰায় ১,১৪০ গৰাকী লোকৰ মৃত্যু হৈছিল । তেওঁলোক মুখ্যতঃ সাধাৰণ লোক ।
এই আক্ৰমণৰ পাছতে ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে যুদ্ধ ঘোষণা কৰে । ইজৰাইলে গাজাত বোমা বিস্ফোৰণ আৰম্ভ কৰে । পৰৱৰ্তী কেইবা সপ্তাহৰ বাবে বিভিন্ন অঞ্চলত আঘাত কৰে আৰু সম্পূৰ্ণৰূপে ঘেৰাও কৰাৰ নিৰ্দেশ দিয়ে । খোৱাপানী, বিদ্যুৎ আৰু খাদ্য যোগান বন্ধ কৰা হয় । ফলত গাজাৰ সমগ্ৰ জনতা বিশেষকৈ ১৮ বছৰৰ তলৰ লোকসকল যথেষ্ট ক্ষতিগ্ৰস্ত হয় । নিম্নতম স্বাস্থ্যসেৱাৰ লগতে চিকিৎসালয়ৰ যোগানো ক্ৰমান্বয়ে হ্ৰাস হয় ।
ইজৰাইলৰ বিমান অভিযান অতি ভয়ংকৰ আছিল আৰু পূৰ্বৰ সকলো অভিলেখ ভংগ কৰিছিল । দ্য ইকনমিষ্টৰ এক প্ৰতিবেদন অনুসৰি, ইজৰাইলে গাজাত ২৯,০০০ এয়াৰ-টু-গ্ৰাউণ্ড যুদ্ধাস্ত্ৰ নিক্ষেপ কৰিছিল ।
গাজাৰ বেছিভাগ অংশই বিমান আক্ৰমণৰ দ্বাৰা ক্ষতিগ্ৰস্ত হয় । ইফালে ইজৰাইলে ২৭ অক্টোবৰত গাজা ষ্ট্ৰিপত বৃহৎ পৰিমাণৰ ভূমি আক্ৰমণ আৰম্ভ কৰে । টেংক, বুলডোজাৰৰ সৈতে আইডিএফ স্থল বাহিনী অঞ্চলটোলৈ আগবাঢ়ি যায় । মিত্ৰশক্তিৰ সমৰ্থনত নেতান্যাহুৱে কৈছিল যে ভূমি আক্ৰমণৰ উদ্দেশ্য আছিল 'হামাছক ধ্বংস কৰা আৰু গাজা ষ্ট্ৰিপৰ শাসকীয় পক্ষক উৎখাত কৰা '। তেওঁ ভূমি আক্ৰমণক হামাছৰ বিৰুদ্ধে যুদ্ধৰ দ্বিতীয় পৰ্যায় বুলি অভিহিত কৰিছিল ।
গাজাৰ স্বাস্থ্য মন্ত্ৰালয়ে জনোৱা মতে ইজৰাইলৰ বিমান আক্ৰমণ আৰু স্থল অভিযানত এতিয়ালৈকে ১৯,০০০ ৰো অধিক লোক নিহত হৈছে । অৱশ্যে এই সংখ্যাটো নিশ্চিত নহয়, কিয়নো হাজাৰ হাজাৰ লোক সমগ্ৰ গাজাৰ ধ্বংসস্তূপত আৱদ্ধ হৈ আছে বুলি সন্দেহ কৰা হৈছে । এই যুদ্ধত এতিয়ালৈকে ৫০,০০০ ৰো অধিক লোক আহত হৈছে । গাজাত নিহত সকলৰ প্ৰায় ৭০ শতাংশ মহিলা আৰু শিশু । ৰাষ্ট্ৰসংঘৰ তথ্য অনুসৰি, ৭ অক্টোবৰৰ পৰা গাজা ষ্ট্ৰিপত প্ৰায় ৪০,০০০ অট্টালিকা ক্ষতিগ্ৰস্ত বা ধ্বংস হৈছে ।
ইজৰাইলৰ পশ্চিমীয়া মিত্ৰশক্তি যেনে আমেৰিকা যুক্তৰাষ্ট্ৰ, ফ্ৰান্স, জাৰ্মানী, ব্ৰিটেইন আৰু বিভিন্ন ইউৰোপীয় দেশে হামাছ আক্ৰমণক গৰিহণা দিয়ে আৰু তেল আভিভৰ সৈতে একতা প্ৰকাশ কৰি ইয়াৰ 'প্ৰতিৰক্ষাৰ অধিকাৰ' নিশ্চিত কৰে । ইয়াৰ বিপৰীতে, প্ৰতিৰোধ অক্ষৰ সদস্যসহ ইছলামিক দেশসমূহে পেলেষ্টাইনীসকলক সমৰ্থন কৰে ।