ইণ্টাৰনেশ্যনেল ডেস্ক, 30 অক্টোবৰ: আমেৰিকাত পুনৰ গুলীচালনাৰ ঘটনা ৷ গুলীচালনাৰ ঘটনাত ছয়জন কিশোৰৰ মৃত্যু ঘটাৰ লগতে এজনৰ অৱস্থা সংকটজনক বুলি জানিব পৰা গৈছে ৷ স্থানীয় কৰ্তৃপক্ষই জনোৱা মতে, শনিবাৰে নিশা লুইজিয়ানাৰ এটা ঘৰৰ আয়োজন কৰা পাৰ্টিত সংঘটিত হয় এই চাঞ্চল্যকৰ গুলীচালনাৰ ঘটনাটো ৷ যাৰ ফলত ছয়জন কিশোৰক গুলীয়াই হত্যা কৰাৰ লগতে এজনৰ অৱস্থা সংকটজনক হৈ পৰে ।
শনিবাৰে মাজনিশা দক্ষিণ-পূব লুইজিয়ানাৰ লেক চাৰ্লছ চহৰৰ এটা ঘৰত গুলীচালনাৰ খবৰ পোৱাৰ পিছতে কেলকাচিউ পেৰিছৰ শ্বেৰিফৰ স্থানীয় কৰ্তৃপক্ষই প্ৰতিক্ৰিয়া প্ৰকাশ কৰে । স্থানীয় কৰ্তৃপক্ষ ঘটনাস্থলীত উপস্থিত হোৱাৰ পিচতে ঘটনাস্থলীৰ পৰা কেবাজনো গুলীৱিদ্ধ কিশোৰক আঘাতপ্ৰাপ্ত অৱস্থাত উদ্ধাৰ কৰে ।
দেওবাৰে শ্বেৰিফৰ কাৰ্যালয়ে এক বিবৃতিযোগে জনোৱা মতে, আটাইকেইজনৰ বয়স 15 ৰ পৰা 19 বছৰৰ ভিতৰত । কৰ্তৃপক্ষই জনোৱা মতে, পাৰ্টীটোত কাজিয়াৰ সূত্ৰপাত ঘটে ৷ যাৰ ফলত কোনোবাই বন্দুক উলিয়াই গুলী চলাবলৈ আৰম্ভ কৰে । আইন প্ৰয়োগকাৰী সংস্থাৰ বিবৃতিত ঘটনা সন্দৰ্ভত কোনো সন্দেহযুক্ত লোক চিনাক্ত কৰা হৈছে নে নাই সেই সন্দৰ্ভত কোনো বক্তব্য আগবঢ়োৱা নাই ।