ইণ্টাৰনেশ্যনেল ডেস্ক, 11 নৱেম্বৰ:আইচলেণ্ডত জৰুৰী অৱস্থা ঘোষণা ৷ ধাৰাবাহিকভাৱে হোৱা ভূমিকম্পৰ কম্পনৰ ফলত অঞ্চলবোৰত আগ্নেয়গিৰি বিস্ফোৰণৰ ভাবুকি প্ৰবল হৈ পৰিছে ৷ ইয়াৰ পিছতে আইচলেণ্ডত নাগৰিকৰ সুৰক্ষা প্ৰদানৰ কথা চিন্তা কৰি প্ৰশাসনে গ্ৰহণ কৰিছে জৰুৰীকালীন ব্যৱস্থা ৷ ধাৰাবাহিকভাৱে হোৱা ভূইকঁপৰ কম্পনৰ পিছত আইচলেণ্ডৰ ৰেইকজেনেছ উপদ্বীপত জৰুৰীকালীন স্তৰত নাগৰিক সুৰক্ষা কাৰ্যকৰী কৰা হয় আৰু গ্ৰিণ্ডাভিকৰ বাসিন্দাসকলক ঘৰ এৰি যাবলৈ পৰামৰ্শ প্ৰদান কৰা হৈছে । আইচলেণ্ডৰ বতৰ বিজ্ঞান কেন্দ্ৰ (আইএমঅ’)ৰ মতে, বৰ্তমান পৰিস্থিতিৰ পৰিপ্ৰেক্ষিতত ছুডুৰ্নেছৰ আৰক্ষী অধীক্ষকে নাগৰিক সুৰক্ষা কৰ্তৃপক্ষৰ সহযোগত গ্ৰীণ্ডাভিক মাছ ধৰা চহৰখন খালী কৰাৰ সিদ্ধান্ত লৈছে ।
বৃদ্ধি পোৱা ভূমিকম্পৰ বাবে আইচলেণ্ডৰ নাগৰিক সুৰক্ষা আৰু জৰুৰীকালীন ব্যৱস্থাপনা বিভাগে ৰেইকজেনেছ উপদ্বীপত জৰুৰীকালীন পৰ্যায় ঘোষণা কৰিছে । আনহাতে আইচলেণ্ড চৰকাৰে সংশ্লিষ্ট সংস্থাসমূহৰ সৈতে ঘনিষ্ঠ সহযোগিতাৰে পৰিস্থিতি নিৰীক্ষণ কৰি আছে ।
আইএমঅ’ই জনোৱা মতে, গ্ৰীণ্ডাভিকৰ উত্তৰত থকা ছুণ্ড্নজুকাগিগাৰৰ ওচৰত জুখি উলিওৱা ভূমিকম্পীয় কাৰ্যকলাপ আৰু শনিবাৰৰ বিয়লি ৰেইকজেনেছ উপদ্বীপত পৰ্যবেক্ষণ কৰা বিকৃতিৰ যথেষ্ট পৰিৱৰ্তন ঘটিছে । আই এম অ’ই আৰু কয়, "মেগমা পৃষ্ঠত উপনীত হ’ব পাৰে নেকি আৰু ক’ত উপনীত হ’ব পাৰে সেইটো সঠিকভাৱে নিৰ্ণয় কৰা সম্ভৱ নহয় ।"