Second earthquake hits Turkey : ১২ ঘণ্টাৰ ভিতৰত দ্বিতীয়টো শক্তিশালী ভূমিকম্প তুৰস্কত

পুৱতি নিশাৰ ৭.৮ প্ৰাবল্যৰ ভূমিকম্পৰ পাছতে তুৰস্কত পুনৰ এক বিধ্বংসী ভূমিকম্প (Second earthquake hits Turkey)। বিয়লি ৭.৫ ৰিখতাৰ স্কেলৰ প্ৰাবল্যত অহা ভূমিকম্পটোৰ অভিকেন্দ্ৰ তুৰস্কৰ একিন'জুৰ পৰা ৪ কিলোমিটাৰ দক্ষিণ-পূবত বুলি জানিব পৰা গৈছে । তুৰস্কত অবৰ্ণনীয় পৰিৱেশে বিৰাজ কৰিছে ।

ইণ্টাৰনেশ্যনেল ডেস্ক,৬ ফেব্ৰুৱাৰী :প্ৰকৃতিৰ ৰোষত পৰিছে তুৰস্ক আৰু ছিৰিয়া । সোমবাৰে পুৱতি নিশা হোৱা ভূমিকম্পৰ বিভীষিকাৰ পৰা এতিয়াও মুক্ত হ'ব পৰা নাই দেশ দুখন । কিন্তু তাৰ মাজতে তুৰস্কত আন এক শক্তিশালী ভূমিকম্প (Second earthquake in Turkey)। এই দ্বিতীয়টো ভূমিকম্পৰ প্ৰাবল্য ৰিখটাৰ স্কেলত ৭.৫ বুলি জানিব পৰা গৈছে । বিয়লি ভাগত দ্বিতীয়টো শক্তিশালী ভূমিকম্পৰ জোঁকাৰণি অনুভৱ কৰে তুৰস্কবাসীয়ে (Again Earthquake in Turkey)।

আমেৰিকা যুক্তৰাষ্ট্ৰৰ ভূতাত্ত্বিক জৰীপৰ তথ্য অনুসৰি, তুৰস্কৰ একিন'জুৰ পৰা ৪ কিলোমিটাৰ দক্ষিণ-পূবত দ্বিতীয়টো ভূমিকম্প অনুভূত হয় । পুৱা ৭.৮ প্ৰাবল্যৰ জোকাৰণিৰ ১২ ঘণ্টাৰ ভিতৰতে আহিছে এই দ্বিতীয়টো শক্তিশালী ভূমিকম্প । প্ৰথমটো ভূমিকম্পই তুৰস্ক আৰু ছিৰিয়াক জোকাৰি গৈছিল আৰু এতিয়ালৈকে এক হাজাৰৰো অধিক লোকৰ মৃত্যু হোৱাৰ তথ্য পোৱা গৈছে ।

ভূমিকম্পৰ ফলত কেইবাটাও অট্টালিকা খহি পৰিছে । এতিয়াও সন্ধানহীন বহু লোক । মৃত্যুৰ সংখ্যা আৰু বৃদ্ধি হোৱাৰ আশংকা কৰা হৈছে । কিন্তু তাৰ মাজতে দ্বিতীয়টো ভূমিকম্পই সমগ্ৰ দেশখনত আতংকময় পৰিৱেশৰ সৃষ্টি কৰিছে (Earthquake damages Turkey)।

প্ৰথমটো ভূমিকম্পৰ অভিকেন্দ্ৰ আছিল প্ৰাদেশিক ৰাজধানী গাজিয়ানটেপৰ পৰা প্ৰায় ৩৩ কিলোমিটাৰ দূৰৈত । নুৰদাগী চহৰৰ পৰা প্ৰায় ২৬ কিলোমিটাৰ নিলগত আছিল ভূমিকম্পটোৰ অভিকেন্দ্ৰ । ১৮ কিলোমিটাৰ গভীৰতাত এই ভূমিকম্পৰ উৎপত্তিস্থল বুলি আমেৰিকা যুক্তৰাষ্ট্ৰৰ ভূতাত্ত্বিক বিভাগে প্ৰকাশ কৰিছিল (Turkey earthquake epicenter) ।

তুৰস্কৰ এনে পৰিস্থিতিৰ পাছতে ইউৰোপীয় ইউনিয়নে উদ্ধাৰকাৰী দল প্ৰেৰণ কৰিছে আৰু তুৰস্কৰ বাবে অধিক সহায়ৰ প্ৰস্তুতি চলাইছে । নেডাৰলেণ্ড আৰু ৰোমানিয়াৰ দলবোৰো ইতিমধ্যে তুৰস্কৰ ভূমিকম্প পীড়িত অঞ্চললৈ ৰাওনা হৈছে । ইউৰোপীয় ইউনিয়নৰ জৰুৰীকালীন সঁহাৰি সমন্বয় কেন্দ্ৰই তেওঁলোকৰ নিযুক্তিৰ তদাৰক কৰি আছে । ভাৰতেও তুৰস্কলৈ উদ্ধাৰকাৰী বিশেষ দল প্ৰেৰণৰ বাবে সাজু হৈছে ।

তুৰস্ক আৰু ছিৰিয়াত হোৱা প্ৰথমটো ভূমিকম্পৰ ফলত চৰকাৰী তথ্য অনুসৰি ইতিমধ্যে ১,২০০ তকৈও অধিক লোকৰ মৃত্যু হৈছে । তুৰস্কৰ ৰাষ্ট্ৰপতি ৰিচেপ তায়িপ এৰ্দোগানে ইয়াক ১৯৩৯ চনৰ পাছত দেশখনৰ সৰ্ববৃহৎ দুৰ্যোগ বুলি অভিহিত কৰিছে । ইফালে প্ৰতিকূল বতৰৰ বাবে অনুসন্ধান আৰু উদ্ধাৰ অভিযানত বাধাৰ সৃষ্টি হৈছে ।

তুৰস্কৰ ৰাষ্ট্ৰপতিয়ে কোৱা মতে এতিয়ালৈকে ৪৫ খনতকৈও অধিক ৰাষ্ট্ৰই দেশখনলৈ সহায় আগবঢ়াইছে । কিন্তু এনে এক পৰিস্থিতিৰ মাজত বিয়লি অহা আনটো ভূমিকম্পই এতিয়া বিশ্ববাসীক উদ্বিগ্ন কৰি তুলিছে । তুৰস্কৰ জনসাধাৰণৰ বাবে প্ৰাৰ্থনা কৰিছে বিশ্ববাসীয়ে ।

লগতে পঢ়ক :Earthquake jolts Turkey: শক্তিশালী ভূমিকম্পত তুৰস্ক আৰু ছিৰিয়াত প্ৰাণ হেৰুৱালে 1300 গৰাকী লোকে