ইণ্টাৰনেচনেল ডেস্ক, ২৪ জুন : নতুন আন্তৰ্জাতিক বিত্তীয় চুক্তি সন্মিলনৰ বাবে পেৰিছৰ পালাইছ ব্ৰগনিয়াৰ্টত উপস্থিত হোৱা পাকিস্তানৰ প্ৰধানমন্ত্ৰী শ্বাহবাজ শ্বৰীফৰ এটা ভিডিঅ' বৰ্তমান ছচিয়েল মিডিয়াৰ চৰ্চাৰ বিষয়বস্তু হৈ পৰিছে । উক্ত ভিডিঅ'টোত শ্বাহবাজক সন্মিলনস্থলীত তেওঁৰ গাড়ীৰ পৰা নামি অহা দেখা গৈছে আৰু এগৰাকী পৰিচাৰিকাই তেওঁক আদৰণি জনায় । সেই সময়ত পেৰিছত বৰষুণ হৈ আছিল । মহিলাগৰাকীয়ে পাকিস্তানৰ প্ৰধানমন্ত্ৰী শ্বাহবাজ শ্বৰীফৰ পিছফালে এটা ছাতি ধৰি আছিল ।
কিন্তু কেইখোজমান খোজকাঢ়ি যোৱাৰ পিছতে শ্বাহবাজে মহিলাগৰাকীৰ পৰা ছাতিটো নিজৰ হাতত লয় । কেৱল সেয়াই নহয়, মহিলাগৰাকীক বৰষুণত ভিজিবলৈ এৰি থৈ তেওঁ প্ৰৱেশদ্বাৰৰ ফালে আগবাঢ়ে । ভিডিঅ'টোত দেখা গৈছে যে পৰিচাৰিকাগৰাকীয়ে বৰষুণত ভিজি ভিজিয়ে তেওঁৰ পিছে পিছে গৈ থাকে । আনহাতে, শ্বাহবাজে ভৱনটোত প্ৰৱেশ কৰাৰ পিছত তেওঁক ফ্ৰান্সৰ ইউৰোপ আৰু বৈদেশিক পৰিক্ৰমা মন্ত্ৰী কেথেৰিন কলোনাই আদৰণি জনায় । আমোদজনক কথাটো হৈছে, এই ভিডিঅ'টো পাকিস্তানৰ প্ৰধানমন্ত্ৰীৰ কাৰ্যালয়ৰ অফিচিয়েল একাউণ্টৰ পৰা টুইট কৰা হৈছে ।