ইণ্টাৰনেশ্যনেল ডেস্ক,১ ডিচেম্বৰ :ইজৰাইল আৰু হামাছৰ যুদ্ধবিৰতিৰ আজি সপ্তম দিন। যুদ্ধবিৰতিৰ চুক্তিৰ অধীনত দুয়োপক্ষই বন্দীসকলক মুকলি কৰাৰ প্ৰক্ৰিয়াও অব্যাহত ৰাখিছে । ইতিমধ্যে ইজৰাইলী সামৰিক বাহিনীয়ে জনোৱা মতে সপ্তম দিনৰ অস্থায়ী যুদ্ধবিৰতি চুক্তিৰ অংশ হিচাপে বৃহস্পতিবাৰে গাজাত হামাছে বন্দী কৰা ৮ গৰাকীক মুকলি কৰি দিছে । ইয়াৰ বিপৰীতে ইজৰাইলেও শুকুৰবাৰে পুৱতি নিশা যুদ্ধবিৰতি চুক্তিৰ অধীনত ৩০ গৰাকী পেলেষ্টাইনী বন্দীক মুক্ত কৰিছে ।
ইজৰাইলে মুকলি কৰা ৩০ পেলেষ্টাইনী বন্দীক লৈ এখন বাছ পশ্চিম তীৰলৈ ৰাওনা হৈছে আৰু হামাছ প্ৰশাসনে তেওঁলোকক স্বাগতম জনোৱা দেখা গৈছে । গাজা ষ্ট্ৰিপত ৮ সপ্তাহ বন্দী হৈ থকাৰ পাছত হামাছ সন্ত্ৰাসবাদীয়ে ৮ গৰাকী ইজৰাইলী বন্দীক মুকলি কৰাৰ কেইঘণ্টামান পাছতে পেলেষ্টাইনী বন্দী ভৰ্তি বাছখন শুকুৰবাৰে পুৱাই ৰামাল্লা চহৰত উপস্থিত হয় । হামাছৰ সেউজীয়া পতাকা লৈ শ শ লোকে বন্দীসকলক আদৰণি জনাইছে । পৰিয়ালৰ সদস্যই তেওঁলোকক আলিংগন কৰা গৈছে ।