ইণ্টাৰনেশ্যনেল ডেস্ক,৫ নৱেম্বৰ :গাজাত ইজৰাইলী প্ৰতিৰক্ষা বাহিনীৰ অভিযান অব্যাহত আছে । ইয়াৰ মাজতে গাজাত হামাছৰ বহু গোপন সুৰংগ উদ্ধাৰ কৰিছে ইজৰাইলী প্ৰতিৰক্ষা বাহিনীয়ে । এই সন্দৰ্ভত প্ৰতিৰক্ষা বাহিনীয়ে এক্সত এটা ভিডিঅ' পোষ্ট কৰিছে । ভিডিঅ'টোৰ জৰিয়তে ইজৰাইলী প্ৰতিৰক্ষা বাহিনীয়ে দাবী কৰিছে যে হামাছে গাজাৰ নাগৰিকসকলক দক্ষিণৰ সুৰক্ষিত স্থানলৈ যোৱাত বাধা দিছে । আনহাতে হামাছে তেওঁলোকৰ সন্ত্ৰাসবাদী সুৰংগৰ জটিল নেটৱৰ্কৰ ভিতৰত লুকাই আছে । ইজৰাইলী সেনাই উত্তৰ গাজাত অভিযানৰ সময়ত তেনে বহু সুৰংগৰ প্ৰৱেশ পথবোৰ উদ্ধাৰ কৰিছে আৰু সেইবোৰ সামাজিক মাধ্যমৰ জৰিয়তে প্ৰকাশ কৰিছে ।
ইফালে ইজৰাইলে দাবী কৰা মতে গাজাৰ পৰা হামাছে অহৰহ মিছাইল আক্ৰমণ অব্যাহত ৰাখিছে । ইজৰাইলৰ তীৰ মিছাইল প্ৰতিৰক্ষা প্ৰণালীয়ে শেহতীয়াকৈ ইলাটৰ উত্তৰে আৰাভা অঞ্চলত এটা ৰকেট নিস্ক্ৰিয় কৰিবলৈ সক্ষম হয় । এই ৰকেটটো শনিবাৰে গাজা ষ্ট্ৰিপৰ পৰা নিক্ষেপ কৰা হৈছিল বুলি ইজৰাইলে দাবী কৰিছে । ইলাট হৈছে আকাবা উপসাগৰত থকা ইজৰাইলৰ বন্দৰ চহৰ আৰু গাজাৰ পৰা প্ৰায় ২৫০ কিলোমিটাৰ দূৰত অৱস্থিত । ইফালে হামাছে এই ৰকেট নিক্ষেপৰ কথা স্বীকাৰ কৰি কয় যে তেওঁলোকে কেইবাটাও আয়াশ-২৫০ ৰকেট নিক্ষেপ কৰিছিল । প্ৰতিবেদন অনুসৰি ইয়াৰ ফলত কোনো হতাহত বা ক্ষতি হোৱা নাই ।