ইজৰাইল-হামাছ যুদ্ধৰ ছাঁয়াত বেথলেহামত পবিত্ৰ বৰদিনৰ প্ৰস্তুতি

বৰদিন উদযাপন বেথলেহম পৰ্যটনৰ বাবে প্ৰধান অৱদানৰ ভিতৰত অন্যতম যিয়ে বছৰি আয়ৰ ৭০ শতাংশ লাভ কৰে। চলি থকা ইজৰাইল-হামাছ যুদ্ধৰ বাবে চহৰখনৰ বিষয়াসকলে প্ৰথাগত খ্ৰীষ্টমাছ ট্ৰী অবিহনে শান্ত বৰদিন পালনৰ সিদ্ধান্ত লয়।

ইন্টাৰনেশ্যনেল ডেস্ক, 17 ডিচেম্বৰ : ইজৰাইল-হামাছ যুদ্ধৰ বাবে যীশুৰ জন্মস্থানত উলহ-মালহেৰে বৰদিনৰ উদযাপন নকৰাৰ সিদ্ধান্ত লোৱাৰ পিছতে জিকমিক লাইট আৰু মেংগাৰ স্কোৱাৰৰ ওপৰত ওখ প্ৰথাগত খ্ৰীষ্টমাছ ট্ৰী নোহোৱাকৈ বেথলেহামে নিয়মমাফিক বৰদিন পালনৰ বাবে সাজু হৈছে ৷

সাধাৰণতে হাজাৰ হাজাৰ দৰ্শনাৰ্থীক আকৰ্ষণ কৰা বৰদিনৰ উৎসৱ বাতিল কৰাটো চহৰখনৰ পৰ্যটন নিৰ্ভৰশীল অৰ্থনীতিৰ বাবে এক মোক্ষম আঘাত ৷ কিন্তু গাজাত পেলেষ্টাইনীসকলৰ অপৰিসীম দুখ-কষ্টৰ সময়ত আনন্দ-উৎসৱ উদযাপন অসহনীয় বুলি কয় মেয়ৰ হানা হানিয়েহে ৷ শুকুৰবাৰে দ্য এছ’চিয়েটেড প্ৰেছক তেওঁ জনায় যে, অৰ্থনীতিৰ ক্ষতি হৈছে ৷ কিন্তু আমাৰ জনসাধাৰণ আৰু গাজাৰ লগত যি ঘটি আছে তাৰ সৈতে যদি আমি ইয়াক তুলনা কৰো তেন্তে সেয়া একো নহয় বুলিও তেওঁ কয় ৷

গাজাৰ হামাছ শাসকৰ বিৰুদ্ধে ইজৰাইলৰ বায়ু আৰু স্থল আক্ৰমণৰ সময়ত 18,700 ৰো অধিক পেলেষ্টাইনী নিহত হোৱাৰ লগতে 50,000 ৰো অধিক আহত হৈছে বুলি তাত স্বাস্থ্য বিষয়াসকলে জনাইছে ৷ আনহাতে ভূখণ্ডটোৰ 23 লাখ বাসিন্দাৰ প্ৰায় 85 শতাংশই স্থানচ্যুত হৈছে ৷ 7 অক্টোবৰত হামাছে দক্ষিণ ইজৰাইলৰ ওপৰত কৰা মাৰাত্মক আক্ৰমণৰ ফলত এই যুদ্ধৰ সূচনা হৈছিল য’ত উগ্ৰপন্থীয়ে প্ৰায় 1200 লোকক হত্যা কৰিছিল, ইয়াৰে অধিকাংশই সাধাৰণ নাগৰিক আৰু 240 জনতকৈ অধিক লোকক পণবন্দী কৰিছিল ৷

7 অক্টোবৰৰ পৰা ইজৰাইলৰ দখলত থকা পশ্চিম পাৰৰ বেথলেহাম আৰু অন্যান্য পেলেষ্টাইনী চহৰলৈ যোৱাটো কঠিন হৈ পৰিছে ৷ সামৰিক চেকপইণ্ট পাৰ হ’বলৈ মটৰচাইকেল আৰোহীৰ দীঘলীয়া শাৰী পৰিলক্ষিত হৈছে ৷ এই নিষেধাজ্ঞাৰ বাবে বহু পেলেষ্টাইনী লোকে ইজৰাইলত কাম কৰিবলৈও এই ভূখণ্ডৰ পৰা ওলাই আহিব নোৱাৰে ৷

যুদ্ধ আৰম্ভ হোৱাৰ পৰাই ইতিমধ্যে পৰ্যটন ক্ষেত্ৰৰ নাটকীয় পতনৰ সৈতে যুঁজি থকা পশ্চিম পাৰৰ ক্ষুদ্ৰ পেলেষ্টাইন অৰ্থনীতিত বন্ধৰ প্ৰভাৱৰ বাবে চহৰৰ নেতাসকলে চিন্তিত হৈ পৰিছে ৷ পেলেষ্টাইনৰ পৰ্যটন খণ্ডই প্ৰতিদিনে 25 লাখ মাৰ্কিন ডলাৰৰ লোকচান ভুগিছে, যিটো বছৰৰ শেষলৈকে 20 কোটি মাৰ্কিন ডলাৰ হ’ব বুলি পেলেষ্টাইনৰ পৰ্যটন মন্ত্ৰীয়ে কয় ৷

আৰ্মেনিয়ান, কেথলিক আৰু অৰ্থডক্স ধৰ্মগোষ্ঠীৰ মাজত ভাগ কৰা বেথলেহামত বছৰি বৰদিন উদযাপন কৰাটো চহৰখনৰ বাবে ডাঙৰ আশীৰ্বাদ, য’ত পৰ্যটনৰ বছৰি আয়ৰ 70 শতাংশ ৷ কিন্তু এই ঋতুত ৰাজপথ খালী ৷ ইজৰাইললৈ যোৱা প্ৰায়বোৰ ডাঙৰ বিমান সংস্থাই বিমান সেৱা বাতিল কৰাৰ লগে লগে বেথলেহামৰ 70 খনতকৈও অধিক হোটেল বন্ধ কৰিবলগীয়া হৈছে, যাৰ ফলত পৰ্যটন খণ্ডৰ প্ৰায় 6 হাজাৰ কৰ্মচাৰী নিবনুৱা হৈ পৰিছে বুলি ছাংকটা মাৰিয়া হোটেলৰ পৰিচালক ছামি থালজীয়ে জনায় ৷

বেথলেহামৰ দোকানৰ মালিক আহমেদ ডান্নাই কয় যে, "মই দিনবোৰ চাহ-কফি খাই, কেতিয়াও নহা গ্ৰাহকৰ বাবে অপেক্ষা কৰি কটাওঁ ৷ আজি আৰু পৰ্যটন নাই ৷" হানিয়েহে কয় যে বৰদিনৰ উৎসৱ বাতিল কৰা হৈছে যদিও ধৰ্মীয় অনুষ্ঠান অনুষ্ঠিত হ’ব, য’ত গীৰ্জাৰ নেতাসকলৰ পৰম্পৰাগত সমাৱেশ আৰু মিডনাইট মাছ আদি অনুষ্ঠিত হ’ব ৷

বেথলেহাম পেলেষ্টাইনী সম্প্ৰদায়ৰ এক অপৰিহাৰ্য অংশ বুলি মেয়ৰে কয় ৷ গতিকে এই বছৰৰ মিডনাইট মাছত শান্তিৰ বাবে প্ৰাৰ্থনা কৰা হ’ব, যিটো শান্তিৰ বাৰ্তা যীশু খ্ৰীষ্টৰ জন্মৰ সময়ত বেথলেহামত প্ৰতিষ্ঠা কৰা হৈছিল বুলি কয় তেওঁ ৷ পেলেষ্টাইনী সাংবাদিক, প্ৰবক্তা আৰু স্কাউট নেতা জৰ্জ কাৰ্লোছ কানাৱাটিয়ে তেওঁৰ চহৰখনক দুখী আৰু হৃদয়বিদাৰক বুলি অভিহিত কৰে ৷ তেওঁ কয় যে তেওঁৰ স্কাউট সৈন্যই চহৰখনত নীৰৱ পদযাত্ৰা চলাব, গাজাত নিহতসকলৰ শোকত ৷

আমি অন্যায় আৰু আক্ৰমণক প্ৰত্যাখ্যান কৰি খ্ৰীষ্টমাছৰ বাৰ্তা লাভ কৰিছো, আৰু শান্তিৰ দেশলৈ শান্তি অহাৰ বাবে আমি প্ৰাৰ্থনা কৰিম, কানাৱাটীয়ে কয় ৷ বেথলেহমৰ বৰদিনৰ উৎসৱৰ উৎসাহ দীৰ্ঘদিন ধৰি ইজৰাইল-পেলেষ্টাইন সম্পৰ্কৰ বেৰ’মিটাৰ হৈ আহিছে ৷

লগতে পঢ়ক :য়েমেনৰ হুথিৰ ড্ৰোন আক্ৰমণ বিফল কৰিলে আমেৰিকানৰ সেনাই, লোহিত সাগৰত অঘটনৰ পৰা ৰক্ষা পৰিল ইজৰাইলৰ জাহাজ