ইণ্টাৰনেশ্যনেল ডেস্ক, ১ নৱেম্বৰ :আমেৰিকাত পুনৰ সংঘটিত হৈছে ভাৰতীয় ছাত্ৰৰ ওপৰত আক্ৰমণৰ ঘটনা । এইবাৰ বৰ্বৰ আক্ৰমণৰ বলি হৈছে এগৰাকী ছাত্ৰ । তেওঁক নৃশংসভাৱে ছুৰীকাঘাত কৰা বুলি বাতৰিত প্ৰকাশ । এক সংবাদ মাধ্যমৰ প্ৰতিবেদন অনুসৰি, আমেৰিকা যুক্তৰাষ্ট্ৰৰ ইণ্ডিয়ানা প্ৰদেশত এগৰাকী ২৪ বছৰীয়া ভাৰতীয় ছাত্ৰক ছুৰীকাঘাত কৰা হয় । তেওঁৰ অৱস্থা বৰ্তমান সংকটজনক বুলি কোৱা হৈছে ।
এনডব্লিউআইইউ টাইমছৰ বাতৰি অনুসৰি, দেওবাৰে পুৱা ইণ্ডিয়ানাৰ ভালপাৰাইচো চহৰৰ এটা ৰাজহুৱা ব্যায়ামাগাৰত তেওঁক আক্ৰমণ কৰা হয় । আক্ৰমণকাৰীক ২৪ বছৰীয়া জৰ্ডান আণ্ড্ৰাডে বুলি চিনাক্ত কৰা হৈছে । বৰুণক ছুৰীকাঘাতৰ ঘটনাৰ তদন্ত কৰ্তৃপক্ষই আৰম্ভ কৰিছে ।
জানিব পৰা মতে, ঘটনাটো সংঘটিত কৰাৰ পিছতে আক্ৰমণকাৰীক গ্ৰেপ্তাৰ কৰা হয় । অভিযুক্তৰ বিৰুদ্ধে মাৰাত্মক অস্ত্ৰ লগত ৰখা আৰু হত্যাৰ চেষ্টাৰ অভিযোগ উত্থাপন কৰা হৈছে ।
"বৰুণক আক্ৰমণকাৰীয়ে ছুৰীৰে আক্ৰমণ কৰে । তেওঁৰ আঘাত অতি গুৰুতৰ । তেওঁৰ আঘাতৰ প্ৰতি লক্ষ্য ৰাখি অৱশেষত ফৰ্ট ৱেইন চিকিৎসালয়লৈ লৈ যোৱা হয় । শেহতীয়া খবৰ অনুসৰি, তেওঁ জীয়াই থকাৰ সম্ভাৱনা শূন্যৰ পৰা পাঁচ শতাংশহে মাত্ৰ ।" উক্ত হিংসাত্মক আক্ৰমণৰ পিছত বৰুণৰ অৱস্থা অতি গুৰুতৰ বুলি সংবাদ প্ৰতিষ্ঠানটোৰ প্ৰতিবেদনত কোৱা হৈছে ।