ইণ্টাৰনেশ্যনেল ডেস্ক, ১২ অক্টোবৰ :ইজৰাইল-গাজা সংঘৰ্ষ তুংগত আছে । কিন্তু তাৰ মাজতে হামাছৰ কমাণ্ডাৰ মাহমুদ আল-জাহাৰৰ এটা ভিডিঅ'ই বিশ্বজুৰি উদ্বেগ সৃষ্টি কৰিছে । ইণ্টাৰনেটত দ্ৰুতগতিত ভাইৰেল হৈ পৰা এই ভিডিঅ'টোত হামাছৰ জ্যেষ্ঠ বিষয়াজনৰ উদ্ভট দাবী প্ৰকাশ পাইছে । তাত তেওঁ দাবী কৰিছে যে বিশ্বজুৰি তেওঁলোকৰ প্ৰভাৱ বিস্তাৰ কৰাৰ বাবে ইজৰাইল কেৱল প্ৰাৰম্ভিক লক্ষ্য ।
উল্লেখ্য যে ইজৰাইলে যোৱা শনিবাৰে হোৱা এক অতৰ্কিত আক্ৰমণৰ প্ৰতিক্ৰিয়াস্বৰূপে হামাছৰ বিৰুদ্ধে যুদ্ধ ঘোষণা কৰাৰ পিছত এই দাবী কৰিছে হামাছৰ কমাণ্ডাৰজনে । ইতিমধ্যে হামাছৰ আক্ৰমণ আৰু ইজৰাইলৰ প্ৰত্যাক্ৰমণত দুয়ো পক্ষৰ হাজাৰোধিক লোকে প্ৰাণ হেৰুৱাইছে ।
আনহাতে, মাহমুদ আল-জাহাৰৰ এই ভিডিঅ' বিবৃতিয়ে সমগ্ৰ আন্তঃৰাষ্ট্ৰীয় সম্প্ৰদায়ত জোকাৰণি তুলিছে । ফুটেজটোত তেওঁ সাহসেৰে ঘোষণা কৰিছে, "ইজৰাইল কেৱল প্ৰথম লক্ষ্য । সমগ্ৰ বিশ্ব আমাৰ আইনৰ অধীনত থাকিব ।"
তেওঁৰ এই দৃষ্টিভঙ্গীয়ে কেৱল আঞ্চলিক উদ্বেগৰে সৃষ্টি কৰা নাই, বৰঞ্চ প্ৰায় ৫১০ নিযুত বৰ্গকিলোমিটাৰ বিস্তৃত সম্পূৰ্ণ বিশ্বক সামৰি লৈছে । জাহাৰৰ মতে, তেওঁলোকৰ উদ্দেশ্য হৈছে লেবানন, চিৰিয়া, ইৰাক আৰু অন্যান্য দেশত পেলেষ্টাইনী আৰু আৰবসকলৰ ওপৰত হোৱা অন্যায়, অত্যাচাৰ আৰু ভয়াৱহতাৰ পৰা মুক্ত এক বিশ্বজনীন ব্যৱস্থা স্থাপন কৰা ।