ইণ্টাৰনেচনেল ডেস্ক, ৩১ মে' :বৰ্তমান মাৰ্কিন যুক্তৰাষ্ট্ৰ ভ্ৰমণত আছে কংগ্ৰেছ নেতা ৰাহুল গান্ধী । তাত তেওঁ মঙলবাৰে ছাণ্টা ক্ৰুজৰ কেলিফ'ৰ্ণিয়া বিশ্ববিদ্যালয়ত প্ৰবাসী ভাৰতীয়সকলক এখন সভাত সম্বোধন কৰে (Rahuls address to NRI at California University) । কিন্তু উক্ত সভাখনৰ সময়তে এক অঘটন সংঘটিত হয় । সভাৰ মাজতে বিজেপি সমৰ্থকসকলে কংগ্ৰেছ নেতা ৰাহুল গান্ধীৰ বিৰুদ্ধে শ্লোগান দিয়ে ।
কিন্তু সেই পৰিস্থিতি হাঁহি হাঁহি মোকাবিলা কৰে ৰাহুল গান্ধীয়ে । লগতে তেওঁ বিজেপি সমৰ্থককেইজনক কেইবাৰমান হাত জোকাৰি অভিবাদন জনোৱাও দেখা যায় । কিন্তু বিজেপি সমৰ্থককেইজনে ৰাহুল গান্ধীৰ অনুষ্ঠানত ব্যাঘাত জন্মাই থকাত অনুষ্ঠানটোৰ আয়োজকসকলে তেওঁলোকক আঁতৰাই লৈ যায় (BJP supporters disrupt Rahuls address to NRI) ।
বিজেপিৰ সমৰ্থককেইজনে উচ্চ স্বৰে জোড়ো, জোড়ো শ্লোগান দিয়াৰ লগে লগে ৰাহুল গান্ধীয়েও তেওঁলোকৰ সৈতে 'ভাৰত জোড়ো' যোগ দিয়ে । উল্লেখ্য, ভাৰত জোড়ো হৈছে কন্যাকুমাৰীৰ পৰা কাশ্মীৰলৈকে প্ৰায় সকলো ৰাজ্য সামৰি সমগ্ৰ দেশজুৰি ৰাহুল গান্ধীৰ শেহতীয়া পদযাত্ৰা (Rahul Gandhi Bharat Jodo Yatra) । ৰাহুলে লগতে কয় যে কংগ্ৰেছ দলটো অতিথিপৰায়ণ । তেওঁলোকে প্ৰত্যেক প্ৰতিদ্বন্দ্বীকে স্বাগতম জনাব আৰু তেওঁলোকক মৰম আৰু ভালপোৱা প্ৰদৰ্শন কৰিব ।
"আমাৰ দলটোৰ গুৰুত্বপূৰ্ণ কথাটো চাওক । কংগ্ৰেছ দলৰ বিষয়ে ক'বলৈ গ'লে আমাৰ সকলোৰে প্ৰতি মৰম আছে । কোনোবাই যদি আহি কিবা ক'ব বিচাৰে তেন্তে তেওঁলোকে সেয়া নিৰ্বিঘ্নে ক'ব পাৰে । তাত আমি খং নকৰোঁ । আমি আক্ৰমণাত্মক হ'বলৈ নাযাওঁ । আমি তেওঁলোকৰ কথা ভালদৰে শুনিম । প্ৰকৃতাৰ্থত ক'বলৈ গ'লে আমি তেওঁলোকৰ প্ৰতি স্নেহশীল হ'ম আৰু তেওঁলোকক মৰম কৰিম... কিয়নো সেয়া আমাৰ প্ৰকৃতি ।" ৰাহুল গান্ধীয়ে তেওঁৰ ভাষণৰ মাজতে কয় ।