ইন্টাৰনেশ্যনেল ডেস্ক, 30 ডিচেম্বৰ :বালুচিস্তানৰ নশ্বিক, তুৰবাট আৰু বুলেদাত হোৱা আক্ৰমণৰ দায়িত্ব স্বীকাৰ কৰিছে সশস্ত্ৰ সংগঠন বালুচ লিবাৰেশ্যন আৰ্মী চমুকৈ বি এল এয়ে । বালুচিস্তান পোষ্টৰ প্ৰতিবেদন অনুসৰি, সেনাৰ শিবিৰত আৰু পাক সেনাক লক্ষ্য কৰি বি এল এয়ে চলোৱা আক্ৰমণৰ ফলত এজন পাকিস্তানী সেনা নিহত হোৱাৰ লগতে আন কেইবাজনো লোক আহত হৈছে ।
ঘটনাৰ সন্দৰ্ভত বি এল এৰ মুখপাত্ৰ জীয়ন্দ বালোচে বুধবাৰে এক বিবৃতি যোগে কয়, ‘‘বি এল এ কেডাৰে স্নাইপাৰ আৰু অত্যাধুনিক বিস্ফোৰক সামগ্ৰী ব্যৱহাৰ কৰি নশ্বিকৰ বালঘানি, কেশাংগী অঞ্চলত অৱস্থিত পাকিস্তানী সেনাৰ শিবিৰত আক্ৰমণ কৰা হৈছিল । বৃহস্পতিবাৰেও তুৰবাটৰ বালুচি বজাৰৰ ওচৰৰ আবচিৰ অঞ্চলত পাক সেনাৰ ওপৰত বি এল এয়ে কেডাৰে গ্ৰেনেডেৰে আক্ৰমণ চলাইছিল ।"
জীয়ন্দ বালোচে দাবী কৰে যে, বি এল এয়ে চলোৱা আক্ৰমণৰ ফলত পাক সেনাৰ সামগ্ৰী যথেষ্ট পৰিমাণে ধ্বংস হৈছিল । তদুপৰি, 24 ডিচেম্বৰৰ সন্ধিয়া বি এল এয়ে বুলেদাত পাকিস্তানী সেনাৰ এটা চেকপইণ্টক গ্ৰেনেডেৰে আক্ৰমণ কৰিছিল ৷ বালুচিস্তান পোষ্টৰ মতে, এই ঘটনাত দুজন পাক সেনা আহত হয় ৷