ইণ্টাৰনেশ্যনেল ডেস্ক,৭ নৱেম্বৰ : গাজাত ইজৰাইলী বাহিনীৰ আক্ৰমণ অব্যাহত আছে । যুদ্ধবিৰতিৰ বাবে বিগত প্ৰায় এসপ্তাহ ধৰি আমেৰিকাৰ পৰা হেঁচা দি থকা হৈছে । ইয়াৰ মাজতে ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে গুৰুত্বপূৰ্ণ ঘোষণা কৰিছে । প্ৰধানমন্ত্ৰীগৰাকীৰ মতে যুদ্ধবিৰতি ঘোষণা কৰা নহয় কিন্তু মানৱীয় দৃষ্টিভংগীৰে হামাছৰ বিৰুদ্ধে আক্ৰমণ কিছু শিথিল কৰিব পাৰে ইজৰাইলে ।
ইজৰাইলৰ পদক্ষেপৰ পাছতে বিশ্বৰ বিভিন্ন দেশৰ লগতে তেওঁ নিজৰ একাংশ সমৰ্থকো অসন্তুষ্ট হোৱা দেখা গৈছে । যাৰ বাবে এই মতভেদ কিছু আঁতৰাবলৈ তেওঁ গুৰুত্বপূৰ্ণ সিদ্ধান্ত গ্ৰহণ কৰিছে । জানিব পৰা মতে ৰাষ্ট্ৰপতি জ' বিডেনে যুদ্ধৰ প্ৰায় এমাহৰ পাছত প্ৰধানমন্ত্ৰীক নেতান্যাহুৱে পোনপটীয়াকৈ যুদ্ধবিৰতিৰ আবেদন জনাইছে আৰু ক্ৰমবৰ্ধমান সংঘৰ্ষত সাধাৰণ নাগৰিকক সীমিত সকাহ প্ৰদানৰো আহ্বান জনাইছিল ।
হামাছ কৰ্তৃপক্ষৰ মতে গাজাত মৃত্যুৰ সংখ্যা ১০,০০০ হৈছে । এনে পৰিস্থিতিত ইজৰাইলৰ প্ৰধানমন্ত্ৰীৰ সৈতে আমেৰিকাৰ ৰাষ্ট্ৰপতিয়ে ব্যক্তিগতভাৱে বাৰ্তালাপ কৰিছে । ৰাষ্ট্ৰীয় নিৰাপত্তা পৰিষদৰ মুখপাত্ৰ জন কাৰ্বিয়ে নেতান্যাহুৰ সৈতে বিডেনৰ বাৰ্তালাপৰ কথা বৰ্ণনা কৰি কয় যে আমেৰিকাই মানৱীয় দৃষ্টিভংগীৰে যুদ্ধবিৰতিৰ বাবে আহ্বান জনাই থাকিব ।