ইণ্টাৰনেশ্যনেল ডেস্ক,১৪ জানুৱাৰী: চীনৰ য়ুহানলৈ যোৱা বিশ্ব স্বাস্থ্য সংস্থাৰ বৈজ্ঞানিকৰ দলৰ দুগৰাকী সদস্য COVID-১৯ত আক্ৰান্ত হোৱা বাবে এতিয়া তেওঁলোক ছিংগাপুৰতে থাকিবলগীয়া হৈছে । এই বৈজ্ঞানিক দুগৰাকীক চীনত প্ৰৱেশ কৰাৰ অনুমতি প্ৰদান কৰা নাই । আনহাতে দলটোত থকা আন ১৩ গৰাকী বৈজ্ঞানিকে বৃহস্পতিবাৰে য়ুহানত উপস্থিত হয় আৰু ভাইৰাছৰ প্ৰকৃত উৎপত্তি সন্দৰ্ভত গৱেষণা কৰিব ।
বিশ্ব স্বাস্থ্য সংস্থাই টুইটযোগে প্ৰকাশ কৰা মতে, দুসপ্তাহৰ বাবে কোৱাৰিণ্টিনত থকাৰ পিছত কাম আৰম্ভ কৰিব বৈজ্ঞানিকৰ দলটোৱে । ছিংগাপুৰত সম্পন্ন হোৱা COVID-১৯ পৰীক্ষাত ভাইৰাছৰ দ্বাৰা সংক্ৰমিত হোৱা বুলি প্ৰমাণিত হোৱাৰ পিছত দুগৰাকী বৈজ্ঞানিক ছিংগাপুৰতে থাকিবলগীয়া হয় । নিজ নিজ দেশত বৈজ্ঞানিকসকলৰ COVID-১৯ পৰীক্ষা সম্পন্ন কৰা হৈছিল । ছিংগাপুৰত পুনৰ তেওঁলোকৰ COVID-১৯ পৰীক্ষা কৰা হয় আৰু দুগৰাকী বৈজ্ঞানিক আক্ৰান্ত হোৱাৰ কথা পোহৰলৈ আহে ।