ইণ্টাৰনেশ্যনেল ডেস্ক, ১৬ অক্টোবৰ: ইণ্ডোনেছিয়াৰ দ্বীপ বালিত প্ৰকৃতিৰ কালৰূপ । শনিবাৰে পুৱা দুটাকৈ ভূমিকম্প(Earthquake)ই জোকাৰি গ'ল বালি(Bali) । ফলত ঠায়ে ঠায়ে ভূমিস্খলন হয় আৰু বাসগৃহৰো ক্ষতিসাধন হয় । এতিয়ালৈকে বালিত ৩ গৰাকী লোকৰ মৃত্যু হৈছে । আনহাতে, ৭ গৰাকী লোক আহত হৈছে ।
ভূমিকম্পৰ জোকাৰণি অনুভূত হোৱাৰ পাচতে আতংকিত হৈ পৰে বালিৰ বাসিন্দাসকল । ক'ভিড-১৯ৰ সংক্ৰমণ হ্ৰাস পোৱাৰ পাচত বিদেশী পৰ্যটকৰ বাবে মুকলি কৰি দিয়া হৈছিল দ্বীপটোৰ পৰ্যটনস্থলীবোৰ । কিন্তু মুকলি কৰাৰ মাত্ৰ দুদিন পাচতে ভূমিকম্পৰ জোকাৰণি অনুভূত হয় । আমেৰিকা যুক্তৰাষ্ট্ৰৰ ভূ-তাত্বিক জৰীপে জনায় যে, ৪.৮ প্ৰাবল্যৰ ভূমিকম্পৰ অভিকেন্দ্ৰ বালিৰ চিংগাৰাজাৰ উত্তৰ-পূৱ দিশত ৬২ কিলোমিটাৰ আছিল ।
আনহাতে, গভীৰতা আছিল ১০ কিলোমিটাৰ । ৪.৮ প্ৰাবল্যৰ ভূমিকম্পৰ পাচতে ৪.৩ প্ৰাবল্যৰ আন এটা ভূমিকম্পৰ জোকাৰণিও অনুভূত হয় । ভূমিকম্পৰ ফলত এখন পাহাৰীয়া জিলাত ভূমিস্খলন হয় ।