আফগানিস্তানৰ মহিলাৰ সুৰক্ষা নিশ্চিত কৰাৰ আহ্বান বিশ্বৰ দুই ডজন ৰাষ্ট্ৰৰ

আফগানিস্তানত তালিবানৰ অধিগ্ৰহণৰ পাচতে আফগানৰ মহিলাসকলৰ সুৰক্ষাক লৈ চিন্তিত হৈ পৰিছে সকলো ৷ আফগানৰ মহিলা আৰু ছোৱালীসকলৰ সুৰক্ষাক লৈ গভীৰ চিন্তা প্ৰদৰ্শন কৰি বিশ্বৰ প্ৰায় দুই ডজন ৰাষ্ট্ৰৰ আফগানিস্তানৰ প্ৰতি বিশেষ আহ্বান ৷ মহিলা তথা ছোৱালীসকলৰ শিক্ষা, কাম আৰু ঘূৰা-ফুৰাৰ অধিকাৰ সুনিশ্চিত কৰাৰ আহ্বান জনাইছে বিশ্বৰ প্ৰায় দুই ডজন ৰাষ্ট্ৰই ৷

ইণ্টাৰনেশ্যনেল ডেস্ক, 19 আগষ্ট : তালিবানে আফগানৰ দখল পুনৰ নিজৰ নিয়ন্ত্ৰণলৈ নিয়াৰ লগে লগে সমগ্ৰ ৰাষ্ট্ৰখনতে এক বিভীষিকাময় পৰিস্থিতিৰ উদ্ভৱ হৈছে ৷ ইয়াৰ সমান্তৰালকৈ অন্য ৰাষ্ট্ৰসমূহো আফগানিস্তানৰ লোকসকলক লৈ চিন্তিত হৈ পৰা পৰিলক্ষিত হৈছে ৷ আফগানিস্তানৰ লোকসকলৰ বাবে বিশেষকৈ মহিলাসকলৰ অধিকাৰৰ বাবে উদ্বেগ প্ৰকাশ কৰি প্ৰায় দুই ডজন ৰাষ্ট্ৰই আফগানিস্তানৰ মহিলা আৰু ছোৱালীসকলৰ সুৰক্ষা সুনিশ্চিত কৰাৰ আহ্বান জনাইছে ৷

বিশ্বৰ প্ৰায় দুই ডজন ৰাষ্ট্ৰৰ দ্বাৰা স্বাক্ষৰিত এক যুটীয়া বিবৃতি প্ৰকাশ কৰি US State Departmentএ আফগানৰ শাসনত থকাসকলক মহিলা আৰু ছোৱালীসকলক সুৰক্ষাৰ নিশ্চয়তা দিয়াৰ আহ্বান জনাইছে ৷ বুধবাৰে প্ৰকাশিত এই বিবৃতিত সংযুক্ত ৰাষ্ট্ৰ(United States), ব্ৰিটেইন(Britain), ইউৰোপীয় ইউনিয়ন(European Union) আৰু 18 খন দেশে স্বাক্ষৰ কৰিছিল ৷

লগতে পঢ়ক :তালিবানে বন্ধ কৰিলে ভাৰতৰ সৈতে সামগ্ৰীৰ আমদানি-ৰপ্তানি

বিবৃতিটোত উল্লেখ থকা অনুসৰি তালিবানৰ অধিগ্ৰহণৰ পৰিপ্ৰেক্ষিতত আফগান মহিলাসকলৰ শিক্ষা, কাম আৰু ঘূৰা-ফুৰাৰ অধিকাৰ(Afghan women's “rights to education, work and freedom of movement)ক লৈ স্বাক্ষৰকাৰীসকল গভীৰভাৱে চিন্তিত ৷

বিবৃতিটোত উল্লেখ আছে যে, "সকলো আফগান লোকৰ দৰে আফগান মহিলা আৰু ছোৱালী সকলো সুৰক্ষা, নিৰাপত্তা আৰু মৰ্যাদা সহকাৰে জীয়াই থকাৰ যোগ্য" ৷ যিকোনো ধৰণৰ বৈষম্য আৰু উৎপীড়ন প্ৰতিৰোধ কৰা উচিত বুলিও বিবৃতিটোত উল্লেখ আছে ৷ স্বাক্ষৰকাৰী দেশসকলে জানিবলৈ দিছে যে, তেওঁলোকক মানৱীয় সহায় আৰু সমৰ্থন আগবঢ়োৱাৰ উদ্দেশ্যে আন্তৰ্জাতিক সম্প্ৰদায় সদায় লগত আছে ৷

লগতে পঢ়ক :তালিবানৰ প্ৰত্যাৱৰ্তন সন্দৰ্ভত জ' বাইডেনৰ প্ৰথম প্ৰতিক্ৰিয়া

বিবৃতিটোৰ মতে, বিগত 20 বছৰত সুনিশ্চিত অধিকাৰ আৰু স্বাধীনতা আফগানিস্তানৰ মহিলা আৰু ছোৱালীসকলৰ জীৱনৰ এক অবিচ্ছেদ্য অংগ হৈ পৰিছিল ৷ এনেক্ষেত্ৰত ভৱিষ্যতৰ যিকোনো চৰকাৰে মহিলাসকলৰ অধিকাৰ আৰু স্বাধীনতা কেনেদৰে নিশ্চিত কৰে সেই কথা সকলোৰে নিৰীক্ষণত থাকিব ৷ ইফালে দেশ দখল কৰি দেওবাৰে কাবুলত প্ৰৱেশ কৰাৰ পাচতে তালিবানে কয় যে, তেওঁলোকৰ চিন্তাধাৰা যথেষ্ট সলনি হৈছে ৷ শেষৰবাৰ শাসনত থকাৰ সময়ত তেওঁলোকে যি কঠোৰ প্ৰতিবন্ধকতা আৰোপ কৰিছিল এইবাৰ তেনেধৰণৰ কোনো প্ৰতিবন্ধকতা আৰোপ নকৰে বুলিও তালিবানে জানিবলৈ দিয়ে ৷

লগতে পঢ়ক :ভাৰতীয় মিলিটাৰী একাডেমীৰ পৰা প্ৰশিক্ষণ লৈছিল এগৰাকী তালিবানী শীৰ্ষ নেতাই