নিউজ ডেস্ক, 14 জুলাই :ভাৰতৰ ব্যক্তিগত নিউজ চেনেলৰ ওপৰত নেপাল চৰকাৰে আৰোপ কৰা নিষেধাজ্ঞা সোমবাৰে আংশিকভাৱে উঠাই লৈছে দেশখনৰ কেবল টেলিভিশ্বন অপাৰেটৰসকলে ৷ নেপালৰ কেবল অপাৰেটৰসকলে সোমবাৰে এক আলোচনাৰ জৰিয়তে এই সিদ্ধান্ত গ্ৰহণ কৰে ৷ অৱশ্যে এতিয়াও দেশখনে সকলোবোৰ নিউজ চেনেলৰ ওপৰত থকা নিষেধাজ্ঞা উঠাই লোৱা নাই যদিও কিছুসংখ্যক চেনেলৰ ওপৰৰ পৰা নিষেধাজ্ঞা উঠাই লৈছে ৷ নেপালৰ টেলিভিশ্বন অপাৰেটৰছ এচছিয়েশ্বনৰ উপ-সভাপতি ধ্ৰুৱ শৰ্মাই সংবাদমাধ্যমৰ আগত এই তথ্য প্ৰকাশ কৰিছে ৷
বিগত বৃহস্পতিবাৰে নেপালৰ কেবল অপাৰেটৰসকলে ভাৰতৰ সকলো ব্যক্তিগত নিউজ চেনেলৰ সম্পচাৰ দেশখনত বন্ধ কৰি দিছিল আৰু একমাত্ৰ দুৰদৰ্শনক দেশখনত বাতৰি সম্প্ৰচাৰৰ ক্ষেত্ৰত অনুমতি বাহাল ৰাখিছিল ৷ নেপালৰ ৰাষ্ট্ৰীয়তাক আঘাত দিয়াৰ বাবে এইসমূহ নিউজ চেনেলক দেশখনত নিষিদ্ধ কৰাৰ বাবে দেশখনৰ কমিউনিকেশ্বন আৰু ইনফৰমেশ্বন টেকনলজি মন্ত্ৰালয়ে কেবল অপাৰেটৰ সংস্থাক ধন্যবাদ জ্ঞাপনো কৰিছিল ৷
শুকুৰবাৰে নেপালে ভাৰতলৈ এক আমোলাতান্ত্ৰিক পত্ৰৰ দ্বাৰা নতুন দিল্লীক নেপালৰ বিৰুদ্ধে দেশৰ ব্যক্তিগত নিউজ চেনেলসমূহে সম্প্ৰচাৰ কৰি অহা বাতৰিসমূহ নিয়ন্ত্ৰণ কৰিবলৈ কৈছিল ৷