চীনে 'ৱেট মাৰ্কেট' নিয়ন্ত্ৰণ কৰাটো আৱশ্যকীয় : এৰিক ছোলহেইম

জ্যেষ্ঠ সাংবাদিক স্মৃতা শৰ্মাৰ সৈতে ৰাষ্ট্ৰসংঘৰ পৰিবেশ কাৰ্যক্ৰমৰ প্ৰাক্তন কাৰ্যকৰী নিৰ্দেশক এৰিক ছোলহেইমৰ সাক্ষাৎকাৰ ৷

ইন্টাৰনেশ্যনেল ডেস্ক, 16 মে' : হাভাৰ্ড বিশ্ববিদ্যালয়ৰ এক শেহতীয়া অধ্যয়ন অনুসৰি, COVID-19 মৃত্যুৰ হাৰ আৰু বায়ু প্ৰদূষণৰ দীৰ্ঘম্ৰাদী সংকটৰ মাজত এক সম্পৰ্ক আছে ৷ ইয়াৰ ফলত ভাৰতৰ দৰে দেশে জটিল পৰিস্থিতিৰ সন্মুখীন হোৱাৰ সম্ভাৱনা আছে যিহেতু বিশ্বৰ 30 খন সৰ্বাধিক প্ৰদূষিত দেশৰ ভিতৰত ভাৰত 21 সংখ্যক স্থানত আছে ৷ অধ্যয়নত লাভ কৰা তথ্য অনুসৰি, প্ৰদূষিত অঞ্চলত থকা লোকৰ দেহত কৰ'ণা ভাইৰাছে আক্ৰমণ কৰাৰ সম্ভাৱনা অধিক ৷ যিহেতু প্ৰদূষণৰ ফলত এনে লোকৰ শ্বাহ-প্ৰশ্বাসজনিত সমস্যাত ভোগাৰ সম্ভাৱনা অধিক হৈ পৰে ৷

কিন্তু, এই মহামাৰীৰ ফলত ঘোষণা কৰা লকডাউনে বহু পৰিমাণে হ্ৰাস কৰিলে বিশ্বজুৰি প্ৰদূষণৰ মাত্ৰা ৷ ৰাষ্ট্ৰসংঘৰ পৰিবেশ কাৰ্যক্ৰমৰ প্ৰাক্তন কাৰ্যকৰী নিৰ্দেশক এৰিক ছোলহেইমে কয় যে, প্ৰদূষণৰ মাত্ৰা হ্ৰাস পোৱাৰ ফলত পৰিৱেশ সংৰক্ষিত হ'ব ৷ জ্যেষ্ঠ সাংবাদিক স্মৃতা শৰ্মাৰ সৈতে মত বিনিয়ম কৰি এৰিক ছোলহেইমে কয় যে, কৰ'ণাৰ পূৰ্বৰ তুলনাত এতিয়াৰ পৃথিৱীখন অধিক সেউজীয়া ৷ সৌৰ আৰু বতাহ শক্তিক সুলভ মূল্যৰ বিকল্প হিচাপে ব্যৱহাৰ কৰা হৈছে ৷ ভাৰতক ইয়াৰ বাবে ধন্যবাদো জ্ঞাপন কৰে এৰিকে ৷

ন'ৰৱেৰ পৰা ছোলহেইমে কয়, "আমাৰ ভৱিষ্যৎ যথেষ্ট ভাল ৷ ভাৰতে এই কথা প্ৰমাণিত কৰিলে যে, ভাৰতে বাঘ আৰু অন্যান্য বনৰীয়া প্ৰাণীৰ শুশ্ৰূষা কৰিছে ৷ বিশ্বৰ ভিতৰতে ভাৰতৰ সৌৰ শক্তিৰ মূল্য কম ৷ অসমত বিশ্বৰ ভিতৰতে প্ৰথমটো সৌৰ ৰেল ষ্টেছন স্থাপন কৰিছিল ৷ ইয়াৰোপৰি, কেৰালাতো ৰেল ষ্টেচন আৰু নতুন দিল্লীত মেট্ৰ' ৰেল ষ্টেচন স্থাপন কৰা হৈছিল ৷ ভাৰতৰ বহুকেইটা যোগাত্মক বিষয় আছে ৷ সমস্যাসমূহ সমাধানৰ বাবে সকলোৱে যুটীয়া প্ৰচেষ্টা আগবঢ়াব লাগিব ৷"

কৰ'ণা ভাইৰাছ আৰু বনৰীয়া প্ৰাণীৰ জীৱনলৈ সংকট সম্পৰ্কত এৰিকে কয় যে, এয়া এক চিন্তাৰ বিষয় আৰু বেইজিঙে ইয়াৰ নিয়ন্ত্ৰণ কৰাৰ প্ৰয়োজন আছে ৷ তেওঁলোকে বনৰীয়া জীৱৰ অবৈধ ব্যৱসায় বন্ধ কৰা উচিত ৷ এক উচ্চ পৰ্যায়ত এই সম্পৰ্কত সিদ্ধান্ত গ্ৰহণ কৰা হৈছে আৰু কাৰ্যকৰী কৰাৰ প্ৰয়োজন আছে ৷ ৱেট মাৰ্কেট কেৱল চীনতে নহয়, বিশ্বৰ বিভিন্ন স্থানত আছে ৷ কিন্তু, চীনৰ বজাৰখন যথেষ্ট ডাঙৰ হোৱাৰ লগতে বিখ্যাত হোৱাৰ বাবে ৰোগৰ সংক্ৰমণৰ কাৰণ হোৱাৰ সম্ভাৱনা আছে ৷

আমেৰিকাই চীনক কৰ'ণা ভাইৰাছৰ উৎপত্তিৰ বাবে দায়ী কৰা সম্পৰ্কত তেওঁ কয়, "বিশ্বজোৰা এই সংকটৰ সময়ত একত্ৰিত হৈ সমস্যাৰ সমাধান কৰা উচিত ৷ আমি বিচাৰো যে, এই সমাধানৰ বাবে আমেৰিকা আৰু চীনে ইউৰোপ আৰু ভাৰতৰ সৈতে একত্ৰিত হৈ কাম কৰা উচিত ৷ আমেৰিকাৰ কানছাচৰ পৰা উদ্ভৱ হোৱা স্পেনিছ ফ্লু সম্পৰ্কত কোনেও মন্তব্য কৰা নাছিল যে, এই ৰোগ আমেৰিকাৰ পৰা উদ্ভৱ হৈছে ৷ সেয়েহে বোকা ছটিওৱাৰ ৰাজনীতিৰ পৰিৱৰ্তে আমি সমাধান বিচাৰিবলৈ চেষ্টা কৰা উচিত ৷"

ছোলহেইমে কয় যে, এছিয়াত ভাৰত আৰু চীনে গুৰুত্বপূৰ্ণ ভূমিকা গ্ৰহণ কৰা উচিত ৷ তেওঁ লগতে কয় যে, এই সময়ছোৱাত সমাধান বিচৰাৰ পৰিৱৰ্তে চীন-আমেৰিকাৰ বোকা ছটিওৱা ৰাজনীতি আৰু ভাৰতত সাম্প্ৰদায়িক সংঘৰ্ষই সমস্যাৰ সৃষ্টি কৰিব পাৰে ৷