লণ্ডন,27 মাৰ্চঃ বৃটিছ প্ৰধানমন্ত্ৰী ব’ৰিছ জনছনক কৰ’ণা ভাইৰাছত আক্ৰান্ত ৰোগীৰ সৈতে কৰমৰ্দন কৰাৰ পৰিপ্ৰেক্ষিতত ভাইৰাছবিধৰ দ্বাৰা আক্ৰান্ত হোৱাৰ আশংকা প্ৰকাশ কৰা হৈছে ৷ বিগত সপ্তাহত লণ্ডনৰ এখন চিকিৎসালয়ত প্ৰধানমন্ত্ৰী গৰাকীয়ে ৰোগী গৰাকীৰ সৈতে কৰমৰ্দন কৰিছিল ৷ জনছনে এক সংবাদমেলত এই কথা পূৰ্বে প্ৰকাশ কৰিছিল ৷ শুকুৰবাৰে প্ৰধানমন্ত্ৰী গৰাকীৰ দেহত কৰ’ণা ভাইৰাছৰ অৱস্থিতিৰ পৰীক্ষা কৰাৰ পিছত এই ভাইৰাছৰ উপস্থিতি ধৰা পৰে ৷ জনছনৰ দেহত ভাইৰাছবিধৰ সংক্ৰমণৰ কিছু লক্ষণ দেখা দিয়াৰ পিছত পুৱা স্বাস্থ্য পৰীক্ষা কৰা হয় ৷ এই পৰীক্ষাত ভাইৰাছৰ উপস্থিতিৰ কথা পোহৰলৈ আহে ৷ ইয়াৰ পিছত প্ৰধানমন্ত্ৰী গৰাকীয়ে নিজক আছুতীয়াকৈ ৰাখি পৰ্যবেক্ষণ কৰি চৰকাৰী কাম-কাজসমূহ অব্যাহত ৰাখিব বুলি উল্লেখ কৰে ৷ ভিডিঅ’ কনফাৰেন্সৰ জৰিয়তে চৰকাৰী কামসমূহ কৰি যাব বৃটিছ প্ৰধানমন্ত্ৰী গৰাকীয়ে ৷ সমান্তৰালকৈ কৰ’ণা ভাইৰাছৰ বিৰুদ্ধে জনছনে যুঁজ দি যাব বুলি প্ৰকাশ কৰে ৷ "ষ্টে হোম ষ্টে লাইফ"ক সাৰোগত কৰি প্ৰধানমন্ত্ৰী জনছনে সকলো ব্যক্তিকে কৰ’ণা ভাইৰাছৰ বিপক্ষে যুঁজ দি যাবলৈ টুইটৰ জৰিয়তে আহ্বান জনায় ৷
আনহাতে,বুধবাৰে বৃটিছ ৰাজকুমাৰ চাৰ্লচ প্ৰিন্সৰ শৰীৰত আংশিক কৰ’ণা ভাইৰাছৰ লক্ষণ দেখা দিয়াৰ পিছত কৰা স্বাস্থ্য পৰীক্ষাত ভাইৰাছবিধৰ উপস্থিতি ধৰা পৰে ৷ সম্প্ৰতি ৰাজকুমাৰজন স্কটলেণ্ডস্থিত নিজ ঘৰত পৰ্যবেক্ষণত আছে ৷ লগতে ডাচ্ছেছ অৱ কৰ্ণৱাল কেমিলাৰ শৰীৰতো কিছু লক্ষণ ধৰা পৰে যদিয়ো স্বাস্থ্য পৰীক্ষাত ভাইৰাছবিধৰ চিকাৰ নোহোৱাতো সুনিশ্চিত হয় ৷