ইন্টাৰনেশ্যনেল ডেস্ক, 20 জানুৱাৰীঃবাংলাদেশৰ এক ন্যায়ালয়ে 2001 চনৰ ৰাজনৈতিক ৰেলী বিস্ফোৰণত জড়িত নিষিদ্ধ ঘোষিত সন্ত্ৰাসবাদী সংগঠন হৰকত-উল-জেহাদ অল-ইছলামীৰ 10 গৰাকী সদস্যক মৃত্যুদণ্ডৰ ৰায় প্ৰদান কৰে ৷
তৃতীয় অতিৰিক্ত মেট্ৰ’পলিটান সত্ৰ ন্যায়াধীশৰ ঢাকা ন্যায়ালয়ৰ ন্যায়াধীশ এমডি ৰাবুল আলমে এই মৃত্যদণ্ডৰ ৰায়ৰ ঘোষণা কৰে ৷
উল্লেখ্য যে, 2001 চনৰ 20 জানুৱাৰীত ৰাজধানী ঢাকাৰ পল্টন খেলপথাৰত বাংলাদেশ কমিউনিষ্ট দলৰ ৰেলীত হোৱা বিস্ফোৰণত পাঁচগৰাকী লোকৰ মৃত্যু হৈছিল আৰু প্ৰায় 50 গৰাকী লোক আহত হৈছিল ৷ ইয়াৰ পৰিৱৰ্তী পৰ্যায়ত বাংলাদেশ কমিউনিষ্ট দলৰ সেইসময়ৰ অধ্যক্ষ মোনজুৰল এহছান খানে এই ঘটনা সন্দৰ্ভত অচিনাকী দুৰ্বৃত্তৰ বিৰুদ্ধে দোষাৰোপ কৰি গোচৰ ৰুজু কৰিছিল ৷
অনুসন্ধানকাৰী বিষয়া চি.আই.ডি পৰিদৰ্শক মৃণাল কান্তি শ্বাহাই 2013 চনৰ 27 নৱেম্বৰত ঢাকাৰ মুখ্য মেট্ৰ’পলিটান মেজিষ্ট্ৰেট ন্যায়ালয়ত এই ঘটনাৰ দুখন অভিযোগ পত্ৰ দাখিল কৰিছিল ৷ শুনানিৰ সময়ত ন্যায়ালয়ে এই ঘটনা সন্দৰ্ভত গোচৰদাৰীসহ 46 অভিযোজন পক্ষৰ সাক্ষীৰ বক্তব্য ৰুজু কৰিছিল ৷ আনহাতে বিগত 2019 বৰ্ষৰ 1 ডিচেম্বৰত ন্যায়ালয়ে সকলো পক্ষৰ সকলো দলিল পৰ্যবেক্ষণ কৰাৰ পিচত উপস্থাপনৰ তাৰিখ নিৰ্ধাৰণ কৰে ৷
আৰু পঢ়কঃইৰান সন্দৰ্ভত আমেৰিকাৰ ৰাষ্ট্ৰপতিক সাৱধানবাণী ইউনেস্ক'ৰ