নিউজ ডেস্ক, ২৮ ডিচেম্বৰ: আজেৰবাইজানৰ প্ৰতিৰক্ষা মন্ত্ৰালয়ে সোমবাৰে কয় যে, তেওঁলোকৰ সেনা বাহিনী আৰ্মেনিয়ান সশস্ত্ৰ বাহিনীৰ আক্ৰমণৰ বলি হৈছে । নাগাৰ্ণো'-কাৰাবাখত হোৱা এই আক্ৰমণত এগৰাকী আজেৰবাইজান সেনা জোৱান নিহত হোৱাৰ লগতে আন এজন গুৰুতৰভাৱে আহত হয় । মন্ত্ৰালয়ে প্ৰকাশ কৰিছে যে, দেওবাৰে বিয়লি খোজাভেন্দ অঞ্চলত এই ঘটনা সংঘটিত হয় ।
আৰ্মেনিয়ান সশস্ত্ৰ বাহিনীৰ আক্ৰমণৰ যোগ্য প্ৰত্যুত্তৰ দিয়ে আজেৰবাইজান সেনাই আৰু সেনাৰ প্ৰত্যাক্ৰমণত ৬ জন আক্ৰমণকাৰী ধৰাশায়ী হয় । উল্লেখ্য যে, আৰ্মেনিয়ান প্ৰতিৰক্ষা মন্ত্ৰালয়ে চুবুৰীয়া হেড্ৰাট অঞ্চলত আক্ৰমণ কৰা বুলি সংবাদ মাধ্যমে প্ৰকাশ প্ৰতিবেদন অস্বীকাৰ কৰাৰ কেইঘণ্টা মানৰ পিছতে আজেৰবাইজানৰ প্ৰতিৰক্ষা মন্ত্ৰালয়ে এক বিবৃত্তিযোগে নাগাৰ্ণো-কাৰাবাখ কাণ্ডৰ বিষয়ে প্ৰকাশ কৰে ।
আৰ্মেনিয়াৰ প্ৰতিৰক্ষা মন্ত্ৰালয়ে কোৱা মতে, আৰ্মেনিয়ান সেনাই নাগাৰ্ণো-কাৰাবাখত যুদ্ধ বিৰতি পালন কৰি আছে । আজেৰবাইজানৰ বিবৃত্তি সন্দৰ্ভত আৰ্মেনিয়া আৰু নাগাৰ্ণো-কাৰাবাখ কৰ্তৃপক্ষই কোনো ধৰণৰ বিস্তৃত তথ্য প্ৰকাশ কৰা নাই । নাগাৰ্ণো -কাৰাবাখ আজেৰবাইজানৰ অন্তৰ্ভুক্ত । কিন্তু ১৯৯৪ চনত বিচ্ছিন্নতাবাদী যুদ্ধৰ সমাপ্তিৰ পিছৰে পৰাই এইটো অঞ্চল আৰ্মেনিয়া সমৰ্থিত সেনাৰ নিয়ন্ত্ৰণত আছিল ।
এই যুদ্ধখনে আৰ্মেনিয়াৰ হাতত আশে-পাশে থকা ভূ-খণ্ডৰ অধিকাৰ চমজাই দি নাগাৰ্ণো-কাৰাবাখক একাষৰীয়া কৰে । আৰ্মেনিয়া আৰু আজেৰবাইজানৰ মাজৰ দশক জোৰা সংঘৰ্ষ যোৱা ছেপ্টেম্বৰ মাহৰ শেষৰ সময়খিনিৰ পৰা যথেষ্ট বৃদ্ধি পায় । এই যুঁজত দুয়ো পক্ষৰ ৫৬০০ৰো অধিক লোকে প্ৰাণ হেৰুৱাইছে । যোৱা ১২ ডিচেম্বৰত নাগাৰ্ণো-কাৰাবাখৰ দক্ষিণ দিশত আৰ্মেনিয়া আৰু আজেৰবাইজানৰ মাজত নতুনকৈ সংঘৰ্ষৰ সূত্ৰপাত হয় । দুয়ো পক্ষই পৰস্পৰৰ যুদ্ধ বিৰতি উলংঘনৰ অভিযোগ উত্থাপন কৰি আহিছে ।
লগতে পঢ়ক:দক্ষিণ কোৰিয়াত COVID-19ৰ নতুন ষ্ট্ৰেইনৰ সংক্ৰমণৰ প্ৰথমটো ঘটনা
