ইন্টাৰনেশ্যনেল ডেস্ক, 21 ফেব্ৰুৱাৰীঃ ভাৰত ভ্ৰমণৰ প্ৰাকমুহূৰ্তত মাৰ্কিন ৰাষ্ট্ৰপতি ড’নাল্ড ট্ৰাম্পে বৃহস্পতিবাৰে দুয়োখন দেশৰ মাজত এক গুৰুত্বপূৰ্ণ বাণিজ্যিক চুক্তি স্বাক্ষৰ হোৱাৰ বিষয়ে উল্লেখ কৰে ৷
বৃহস্পতিবাৰে লছ ভেগাছত অনুষ্ঠিত প্ৰিজনাৰ্চ গ্ৰেজুৱেচন অনুষ্ঠানত অংশগ্ৰহণ কৰি ৰাষ্ট্ৰপতিগৰাকীয়ে উল্লেখ কৰে যে ভাৰত ভ্ৰমণত দুয়োখন দেশৰ মাজত এক গুৰুত্বপূৰ্ণ বাণিজ্যিক চুক্তিৰ স্বাক্ষৰ কৰা হ’ব ৷
ৰাষ্ট্ৰপতি ড’নাল্ড ট্ৰাম্প আৰু আমেৰিকাৰ ফাৰ্ষ্ট লেডী তথা তেওঁৰ পত্নী মেলেনা ট্ৰাম্পে অহা 24 আৰু 25 ফেব্ৰুৱাৰীত আহমেদাবাদ, আগ্ৰা আৰু নতুন দিল্লী ভ্ৰমণ কৰিব ৷
ট্ৰাম্পে সেই অনুষ্ঠানত প্ৰদান কৰা ভাষণত উল্লেখ কৰে যে, ভাৰতৰ সৈতে এই গুৰুত্বপূৰ্ণ চুক্তিক লৈ আশাবাদী লগতে ভাৰতলৈ অহাৰ পিচত এই বিষয়ে কি হয় দেখা যাব বুলিও উল্লেখ কৰে ৷ ইয়াৰোপৰি তেওঁ কয় যে, এই চুক্তিৰ পৰা আমেৰিকাৰ কি লাভ হ’ব তাৰ ভিত্তিতহে স্বাক্ষৰ কৰা হ’ব ৷ ইয়াৰ বাবে প্ৰথম প্ৰাধান্য আমেৰিকাক দিয়া হ’ব তাৰ পিচতহে চুক্তি সন্দৰ্ভত বিবেচনা কৰা হ’ব ৷
অলপতে প্ৰকাশ পোৱা এক প্ৰতিবেদন অনুসৰি কংগ্ৰেছনেল ৰিচাৰ্চ চাৰ্ভিচে (চিআৰএচ) বাণিজ্যিক সম্পৰ্ক ভাৰতৰ বাবে অত্যন্ত গুৰুত্বপূৰ্ণ ৷ 2018 চনৰ প্ৰতিবেদন অনুসৰি আমেৰিকা বিশ্বৰ দ্বিতীয় সামগ্ৰী ৰপ্তানীকাৰী দেশ হিচাপে পৰিগণিত হৈছে ৷ উল্লেখ্য যে, ইউৰোপিয়ান ইউনিয়ন সামগ্ৰী ৰপ্তানীত বিশ্বৰ প্ৰথম স্থানত থকাৰ বিপৰীতে চীন তৃতীয় স্থানত আছে ৷