নিউজ ডেস্ক, 23 ছেপ্টেম্বৰ : দেশৰ প্ৰধানমন্ত্ৰী নৰেন্দ্ৰ মোডীয়ে বুধবাৰে তিনিদিনীয়া আমেৰিকা ভ্ৰমণৰ বাবে ৱাশ্বিংটনত উপস্থিত হয় ৷ প্ৰধানমন্ত্ৰীয়ে আমেৰিকালৈ যাত্ৰা কৰা সময়ত বিমানত কটোৱা মূহূৰ্তৰ এখন ফটো তেওঁৰ টুইটাৰ একাউন্টত শ্বেয়াৰ কৰে ৷ ফটোখনত প্ৰধানমন্ত্ৰীয়ে অসমৰ জাতীয় জীৱনৰ পৰিচয় গামোচাখন ডিঙিত লৈ কাৰ্যালয়ৰ গুৰুত্বপূৰ্ণ কাম কৰা পৰিলক্ষিত হয় ৷ ফটোখনৰ কেপছনতো প্ৰধানমন্ত্ৰীয়ে উল্লেখ কৰে, দীঘলীয়া উৰণৰ অৰ্থ হৈছে নথিপত্ৰ আৰু কিছুমান ফাইলৰ কামৰ মাজেৰে যোৱাৰ সুযোগ (A long flight also means opportunities to go through papers and some file work) ।
আমেৰিকালৈ দীৰ্ঘলীয়া প্ৰধানমন্ত্ৰী মোডীক ৱাশ্বিংটন ডচিৰ জয়েন্ট বেছ এণ্ড্ৰুজত আমেৰিকা যুক্তৰাষ্ট্ৰৰ ব্যৱস্থাপনা আৰু সম্পদ বিভাগৰ উপ সচিব টি এইচ ব্ৰায়ান মেককেনকে ধৰি ৰাজ্যিক বিভাগৰ বিষয়াসকলে আদৰণি জনায় ৷ ভাৰতৰ প্ৰধানমন্ত্ৰীগৰাকীক আমেৰিকা যুক্তৰাষ্ট্ৰত ভাৰতৰ ৰাষ্ট্ৰদূত তৰঞ্জিত সিং সান্ধুৰ লগতে ব্ৰিগেডিয়াৰ অনুপ সিংঘল, এয়াৰ কমোডৰ অঞ্জন ভদ্ৰ আৰু নৌ সেনা কমোডৰ নিৰ্ভয়া বাপনাকে ধৰি প্ৰতিৰক্ষা বিভাগৰ শীৰ্ষ নেতৃত্বই আদৰণি জনায় ৷
মোডীয়ে তেওঁৰ ভ্ৰমণকালত ৰাষ্ট্ৰসংঘৰ সাধাৰণ সভাত অংশগ্ৰহণ কৰি ভাষণ প্ৰদান কৰিব ৷ তদুপৰি হোৱাইট হাউচত আমেৰিকা যুক্তৰাষ্ট্ৰৰ ৰাষ্ট্ৰপতি জ’ বাইডেনৰ সৈতে দ্বি-পাক্ষিক বৈঠকত মিলিত হ'ব ৷ ভাৰতীয় সম্প্ৰদায়ৰ এশৰো অধিক সদস্যই ভাৰতৰ প্ৰধানমন্ত্ৰীগৰাকীক আদৰণি জনোৱাৰ বাবে একত্ৰিত হৈছিল বিমানবন্দৰত ৷ প্ৰধানমন্ত্ৰী মোডীৰ বিমানখন ৱাশ্বিংটনত অৱতৰণ কৰাৰ লগে লগে প্ৰবাসী ভাৰতীয়সকলে আনন্দোল্লাস কৰিবলৈ আৰম্ভ কৰে ৷ প্ৰতিকূল বতৰ হোৱা স্বত্বেও প্ৰবাসী ভাৰতীয়সকলে প্ৰধানমন্ত্ৰীগৰাকীৰ আগমনৰ বাবে বিমানবন্দৰত ধৈৰ্য সহকাৰে অপেক্ষা কৰে ৷
২৪ ছেপ্তেম্বৰত হোৱাইট হাউচত বাইডেনৰ আতিথ্য গ্ৰহণ কৰিব প্ৰধানমন্ত্ৰী মোডীয়ে ৷ ২০ জানুৱাৰীত বাইডেনে আমেৰিকা যুক্তৰাষ্ট্ৰৰ ৰাষ্ট্ৰপতি হিচাপে দায়িত্ব গ্ৰহণ কৰাৰ পিছত এয়া দুয়োগৰাকী নেতাৰ মাজৰ প্ৰথম ব্যক্তিগত বৈঠক ৷ ক’ভিড-১৯ মহামাৰীৰ প্ৰাদুৰ্ভাৱৰ পিছত এয়া প্ৰধানমন্ত্ৰী নৰেন্দ্ৰ মোডীৰ প্ৰথমটো বিদেশ ভ্ৰমণ ৷ কোৱাড লিডাৰ্ছ সন্মিলনত অংশগ্ৰহণ কৰিবলৈ আমেৰিকালৈ ৰাওনা হোৱাৰ পূৰ্বে বুধবাৰে প্ৰধানমন্ত্ৰীগৰাকীয়ে কয় যে, তেওঁৰ এই ভ্ৰমণ আমেৰিকা যুক্তৰাষ্ট্ৰ, জাপান আৰু অষ্ট্ৰেলিয়াৰ সৈতে কৌশলগত অংশীদাৰীত্ব শক্তিশালী কৰাৰ এক মাধ্যমত পৰিণত হ'ব ৷