74 সংখ্যক ৰাষ্ট্ৰসংঘৰ সাধাৰণ পৰিষদৰ বৈঠকলৈ প্ৰধানমন্ত্ৰী মোডী

74 সংখ্যক ৰাষ্ট্ৰসংঘৰ সাধাৰণ পৰিষদৰ বৈঠকত অংশগ্ৰহণ কৰিবলৈ নিউয়ৰ্কত উপস্থিত প্ৰধানমন্ত্ৰী মোডী ৷ 'হাউদি মোডী' অনুষ্ঠানত প্ৰবাসী ভাৰতীয়সকলৰ লগত মিলিত হৈ প্ৰধানমন্ত্ৰীগৰাকী উৰা মাৰে নিউয়ৰ্ক অভিমুখে ৷

ইন্টাৰনেশ্যনেল ডেস্ক, 23 ছেপ্টেম্বৰঃ নিউয়ৰ্কৰ স্থানীয় সময় অনুযায়ী দেওবাৰে নিশা 74 সংখ্যক ৰাষ্ট্ৰসংঘৰ সাধাৰণ পৰিষদৰ বৈঠকত অংশগ্ৰহণ কৰিবলৈ নিউয়ৰ্কত উপস্থিত প্ৰধানমন্ত্ৰী মোডী ৷ প্ৰায় 50,000 প্ৰবাসী ভাৰতীয়ক উদ্দেশ্যি আমেৰিকাৰ হাষ্টনৰ NRG ষ্টেডিয়ামত 'হাউদি মোডী' অনুষ্ঠানত উদাত্ত ভাষণৰে বিশ্ববাসীৰ মন জয় কৰে প্ৰধানমন্ত্ৰী গৰাকীয়ে ৷ এই অনুষ্ঠানত প্ৰধানমন্ত্ৰী মোডীৰ লগতে উপস্থিত থাকে মাৰ্কিন যুক্তৰাষ্ট্ৰৰ ৰাষ্ট্ৰপতি ড’নাল্ড ট্ৰাম্প ৷ 'হাউদি মোডী' অনুষ্ঠানত প্ৰবাসী ভাৰতীয়সকলৰ লগত মিলিত হৈ প্ৰধানমন্ত্ৰীগৰাকী উৰা মাৰে নিউয়ৰ্ক অভিমুখে ৷
নিশা প্ৰায় 10 মান বজাত জে এফ কে আন্তঃৰাষ্ট্ৰীয় বিমান বন্দৰত উপস্থিত হয় ৷ এই পাচঁ দিনীয়া ভ্ৰমণ কালত প্ৰধানমন্ত্ৰীগৰাকীয়ে দ্বিপাক্ষিক আৰু বহুপাক্ষিক কাৰ্যসূচী লৈ আলোচনা কৰিব ৷ ইয়াৰ উপৰিও সন্মিলনত অতি গুৰুত্বপূৰ্ণ 9 টা ভাষণ প্ৰদান কৰিব প্ৰধানমন্ত্ৰী গৰাকীয়ে ৷

এই সময়চোৱাত প্ৰায় 75 খন দেশৰ ৰাষ্ট্ৰপ্ৰধানৰ লগতে বৈদেশিক মন্ত্ৰীৰে মিলিত হ’ব প্ৰধানমন্ত্ৰী মোডী,কেন্দ্ৰীয় বৈদেশিক পৰিক্ৰমা মন্ত্ৰী এচ. জয়শংকৰ আৰু ৰাজ্যিক বৈদেশিক পৰিক্ৰমা মন্ত্ৰী ভি. মুৰুলীধৰণ ৷

সোমবাৰে প্ৰধানমন্ত্ৰী গৰাকীয়ে এখন উচ্চ পৰ্যায়ৰ 'CLIMATE ACTION SUMMIT'ত অংশগ্ৰহণ কৰিব ৷ ৰাষ্ট্ৰসংঘৰ সচিব প্ৰধান এন্টনিয় গুটাৰ্চে আঁতধৰিব লগীয়া এই সন্মিলনখন ৰাষ্ট্ৰসংঘৰ সাধাৰণ পৰিষদৰ কক্ষত অনুষ্ঠিত হ’ব ৷
এই বৈঠকত পৰিৱেশ আৰু জলবায়ু সম্পৰ্কে আলোচনা কৰিবলৈ 63খন দেশক আমন্ত্ৰণ জনোৱা হৈছে ৷ জলবায়ু সংৰক্ষণৰ ক্ষেত্ৰত কি পদক্ষেপ লোৱা হ’ব সেই বিষয়ে এই সন্মিলনত আলোচনা কৰা হ’ব ৷