ৰিপাব্লিকানৰ ৰাষ্ট্ৰীয় সন্মিলন আৰু ট্ৰাম্পৰ ভাষণ

"মোৰ পিতৃয়ে শক্তিশালী পদক্ষেপ লৈছে ৷ তেওঁ কি বিশ্বাস কৰে সেয়া তেওঁৰ জ্ঞাত আৰু তেওঁৰ চিন্তাৰ বিষয়ে প্ৰকাশ কৰিছে ৷ তেওঁৰ সৈতে সহমত হওঁক বা নহওঁক, তেওঁৰ স্থান ক'ত সেয়া আপোনালোকে জানে ৷ মোৰ পিতৃৰ কথা কোৱাৰ ধৰণটো বহুতৰে সহ্য নহয় আৰু তেওঁৰ টুইটসমূহো ৷ কিন্তু ইয়াৰ ফলাফলে তেওঁৰ বিষয়েই প্ৰকাশ কৰে ৷" ইভাংকাই পিতৃ ট্ৰাম্প সন্দৰ্ভত এইদৰে কয় ৷

ইন্টাৰনেশ্যনেল ডেক্স, 29 আগষ্টঃ আমেৰিকাৰ ৰাষ্ট্ৰপতি ডনাল্ড ট্ৰাম্পে আজি আনুষ্ঠানিকভাৱে তেওঁৰ পুন-মনোনয়ন দাখিল কৰে ৷ আমেৰিকাৰ ৰাষ্ট্ৰপতি পদৰ বাবে ৰিপাব্লিকান দলৰ ৰাষ্ট্ৰীয় সন্মিলনৰ সময়তে তেওঁ নিজৰ মনোনয়ন দাখিল কৰে ৷

হোৱাইট হাউচত কোনোধৰণৰ সামাজিক দুৰত্ব আৰু মাস্ক নিপিন্ধাকৈ কন্যা ইভাংকা ট্ৰাম্পৰ সৈতে আহি উপস্থিত হোৱাৰ লগতে নিজৰ মনোনয়ন দাখিল কৰে ৷

ইভাংকাই নিজৰ ভাষণত তেওঁৰ পিতৃক ৰাইজৰ ৰাষ্ট্ৰপতি বুলি উল্লেখ কৰাৰ লগতে তেওঁ আমেৰিকাক পুনৰবাৰ এখন মহান ৰাষ্ট্ৰ হিচাপে প্ৰতিষ্ঠা কৰাৰ বাবে যথেষ্ট কষ্ট কৰিছে বুলি উল্লেখ কৰে ৷

"মোৰ পিতৃয়ে শক্তিশালী পদক্ষেপ লৈছে ৷ তেওঁ কি বিশ্বাস কৰে সেয়া তেওঁৰ জ্ঞাত আৰু তেওঁৰ চিন্তাৰ বিষয়ে প্ৰকাশ কৰিছে ৷ তেওঁৰ সৈতে সহমত হওঁক বা নহওঁক, তেওঁৰ স্থান ক'ত সেয়া আপোনালোকে জানে ৷ মোৰ পিতৃৰ কথা কোৱাৰ ধৰণটো বহুতৰে সহ্য নহয় আৰু তেওঁৰ টুইটসমূহো ৷ কিন্তু ইয়াৰ ফলাফলে তেওঁৰ বিষয়েই প্ৰকাশ কৰে ৷" ইভাংকাই পিতৃ ট্ৰাম্প সন্দৰ্ভত এইদৰে কয় ৷

ট্ৰাম্পে নিজৰ ভাষণত তেওঁৰ প্ৰতিদ্বন্দী জ্ বিদেন আৰু তেওঁৰ 47 বৰ্ষীয় কাৰ্যকালক আক্ৰমণৰ লক্ষ্য কৰি লয় ৷ ট্ৰাম্পৰ মতে, ডেম'ক্ৰেটছসকল হৈছে অতিশয় মৌলবাদী বাঁওপন্থী চিন্তাধাৰাৰে পুষ্ট ৷ যাৰ বাবেই ডেম'ক্ৰেটছসকলৰ শাসনত থকা মিনিয়াপোলিছ অথবা কেনোছাত বৰ্ণবাদ আৰু ক'লা লোকসকলৰ জীৱনক লৈ ব্যাপক হিংসা সংঘটিত হৈছে ৷ "এয়া আমাৰ ইতিহাসৰ আটাইতকৈ গুৰুত্বপূৰ্ণ নিৰ্বাচন ৷ পূৰ্বতে কোনো ভোটাৰে দুটা দল, দুটা আদৰ্শ, দুটা চিন্তাধাৰা, দুটা কৰ্মনীতিৰ সন্দৰ্ভত স্পষ্টভাৱে নিৰ্দিষ্ট কৰিব পৰা নাছিল ৷ এই নিৰ্বাচনে আমেৰিকাৰ সপোন সুৰক্ষিত কৰিব নে আমাৰ স্পষ্টবাদী ভাগ্যক সামাজিকভাৱে ধ্বংস কৰিবলৈ অনুমতি প্ৰদান কৰিব সেয়া নিশ্চিত কৰিব ৷" ট্ৰাম্পে এইদৰে কয় ৷

ট্ৰাম্পে নিজৰ 71 মিনিটৰ দীঘলীয়া ভাষণত কয় যে, "আৰু এই নিৰ্বাচনে নিৰ্ধাৰিত কৰিব যে, আমি আমেৰিকান জীৱন ধাৰণৰ মান ৰক্ষা কৰিব নে, ইয়াক ধ্বংস কৰিবলৈ মৌলবাদী আন্দোলনক প্ৰশ্ৰয় দিম ৷ ডেমক্ৰেট ৰাষ্ট্ৰীয় সন্মিলনত জ্ বিদেন আৰু তেওঁৰ দলে আমেৰিকাক বাৰে বাৰে এখন বৰ্ণবাদী, অসামাজিক আৰু অৰ্থনৈতিকভাৱে প্ৰতাৰিত দেশ বুলি উল্লেখ কৰিছে ৷ আজি মই আপোনালোকক সুধিব বিছাৰিছো, ডেমক্ৰেটছসকলে কিদৰে আমাৰ দেশক ৰক্ষা কৰিব, যিহেতু অধিকাংশ সময় তেওঁলোকে আমাক কন্দুৱাইছে ৷"

বিগত সপ্তাহত ভাৰ্চুৱেলী অনুষ্ঠিত হৈ যোৱা ডেম'ক্ৰেটিক সন্মিলনৰ ওপৰত ৰিপাব্লিকান সন্মিলনে কিদৰে অধিক অধিগ্ৰহণ কৰিব ? বহুতেই হোৱাইট হাউচে আমেৰিকান ৰাষ্ট্ৰপতিৰ লগতে তেওঁৰ দলক ৰক্ষণাবেক্ষণ দিয়া বুলি সমালোচনা কৰিছে ৷ সঁচাকৈ ট্ৰাম্পক তেওঁৰ নীতিৰ দ্বাৰা অধিক স্পষ্ট ৰূপত দেখুৱাবলৈ চেষ্টা কৰা হৈছে নেকি ? নৱেম্বৰত হ'বলগীয়া ৰাষ্ট্ৰপতি নিৰ্বাচনৰ মুখ্য দিশসমূহ কি হিচাপে প্ৰকাশ পাব ?

জ্যেষ্ঠ সাংবাদিক স্মিতা শৰ্মাই আমাৰ #BattlegroundUSA2020 শীৰ্ষক এই প্ৰতিবেদনত ৰিপাব্লিকান ৰাষ্ট্ৰীয় সন্মিলন আৰু ট্ৰাম্পৰ মনোনয়ন দাখিলৰ ভাষণৰ বিষয়ে দাঙি ধৰিছে ৷

ৱাশ্বিংটন ডিচিস্থিত জ্যেষ্ঠ সাংবাদিক তথা নিৱন্ধকাৰ সীমা চিৰোহীয়ে কয় যে, "হোৱাইট হাউচ লনত 1500ৰো অধিক লোক আছিল আৰু তেঁওলোকৰ অধিকাংশই মাস্ক পৰিধান কৰা নাছিল ৷ এয়া স্পষ্টভাৱে দেখা গৈছিল ৷ যেন মহামাৰী নাই, তেনেকৈয়ে তেঁওলোক একেবাৰে ওচৰা ওচৰিকৈ বহিছিল ৷ এগৰাকী বক্তাই মহামাৰী সন্দৰ্ভত অতীত কালত ভাষণ প্ৰদান কৰে ৷ সেয়ে ইয়াক এক অন্য বিশ্ব যেনহে লাগিছিল ৷ হোৱাইট হাউচৰ এখন প্ৰৱেশদ্বাৰত প্ৰতিবাদকাৰীসকলক আৰক্ষীয়ে বাধা প্ৰদান কৰি ৰাখিছিল ৷ ৱাশ্বিংটনত অহাকালি এক বৃহৎ প্ৰতিবাদী সমদল বাহিৰ কৰা হ'ব ৷ মোৰ লাগিছিল যে, এয়া দুখন পৃথক পৃথক দেশত হৈ আছে ৷ সন্মিলনৰ সময়ত এয়া দেখা গৈছিল যদিও আজি ইয়াক শব্দৰে প্ৰকাশ কৰিব পৰাকৈ যথেষ্টখিনি হৈ গৈছে ৷"

"আজি এটা কাহিনী শুনিব যে, আমেৰিকা কি আৰু ট্ৰাম্পৰ নীতিৰ ফালৰ পৰা ই কি হ'ব আৰু কিছুদিন পূৰ্বৰ বিদেনৰ নীতিৰ পৰা আমেৰিকা কি হ'ব ৷ এক কথাত দুয়োটা দিশেই সমানে বৈধ আৰু সমানে অবৈধ ৷ তেওঁলোকৰ সাফল্য নিৰ্বাচনৰ ফলাফলেহে নিৰ্ধাৰিত কৰিব ৷" দা হিন্দু সংবাদপত্ৰৰ সহযোগী সম্পাদক ভাৰ্গিছ কে জৰ্জে এইদৰে কয় ৷

"এইটো নিৰ্বাচনত ট্ৰাম্প আৰু বিদেনে প্ৰকাশ কৰা নীতিৰ ওপৰত লক্ষ্য কৰিলে দুয়োটা কাহিনীয়ে দেখায় যে, আমি ভাইৰাছক কোনোধৰণে খাতিৰ নকৰো ৷ আমি এনে এক সভ্যতা যিয়ে কেতিয়াও আত্মসমৰ্পন কৰা নাই কিন্তু ইয়াৰ বিপৰীতে যুদ্ধ কৰিছো আৰু ভাইৰাছটো ধ্বংস কৰিম ৷ এয়া আমেৰিকাই বিশ্ববাসীৰ প্ৰতি প্ৰকাশ কৰা তেওঁলোকৰ শক্তিশালী ভাষ্য ৷ সেয়া হৈছে এখন দেশ যিয়ে আমেৰিকাক বিশ্বাস কৰে, সেইখন দেশে ইৰাকত গৈ যুদ্ধ কৰি মধ্য-প্ৰাচ্যত গণতন্ত্ৰ স্থাপন কৰিবলৈ সক্ষম হৈছিল ৷" 2016ৰ ৰাষ্ট্ৰপতি নিৰ্বাচনৰ সময়ত ৱাশ্বিংটনত থকা ভাৰ্গিছে লগতে এইদৰে উল্লেখ কৰে ৷

ৰিপাব্লিকান আৰু ভাৰতীয় জনতা পাৰ্টীৰ ৰাজনৈতিক আদৰ্শজনিত প্ৰচাৰ নীতি সন্দৰ্ভত তেওঁৰ ধাৰণা কৰে যে, প্ৰধানমন্ত্ৰী মোডীৰ হিন্দু-হিন্দুত্ব ধাৰণাৰ দৰেই ট্ৰাম্পেও বৃহৎ কেথলিক বিশ্বাসক লৈয়ে নিজৰ প্ৰচাৰত নামিছে ৷

মনোনয়ন দাখিলৰ ভাষণত ট্ৰাম্পে বিদেনৰ ওপৰত আঙুলি টোৱাই কয় যে, জ্ বিদেন নিৰ্বাচিত হ'লে চীনে আমাৰ দেশ দখল কৰিব ৷ ইয়াৰ লগতে জেৰুজালেমলৈ আমেৰিকাৰ দূতাৱাস স্থাপন আৰু ইউএই আৰু ইজৰাইলৰ মাজত সম্পাদিত চুক্তি সন্দৰ্ভতো ট্ৰাম্পে উল্লেখ কৰে ৷

"যেতিয়া মই কাৰ্যালয়ত দায়িত্বভাৰ গ্ৰহণ কৰিছিলো, সমগ্ৰ মধ্য-প্ৰাচ্যই একপ্ৰকাৰে হাহাকাৰময় অৱস্থাত আছিল ৷ আইছিছে ধ্বংসলীলা চলাই গৈছিল আৰু ইৰাণৰ উত্থান ঘটিছিল তথা আফগানিস্থানত যুদ্ধৰ বিভীষিকা আৰম্ভ হৈছিল ৷ মই একপক্ষীয় তথা ভয়ংকৰ ইৰাণ পাৰমানৱিক চুক্তিৰ পৰা আঁতৰি আহিছিলো ৷ মোৰ পূৰ্বৰ বহুটো ৰাষ্ট্ৰপতিক বাদ দি মই মোৰ প্ৰতিশ্ৰুতি ৰক্ষা কৰিছিলো ৷ ইজৰাইলৰ ৰাজধানীলৈ আমাৰ দূতাৱাস স্থাপন কৰিছো, আমি ইয়াক নিৰ্মাণ কৰিছো ৷ গোলান উচ্চতাত আমি ইজৰাইলৰ সাৰ্বভৌমত্বক স্বীকাৰ কৰিছো আৰু চলিত মাহতেই বিগত 25 বছৰৰ ভিতৰত মধ্য-প্ৰাচ্যৰ প্ৰথমখন শান্তি চুক্তি স্বাক্ষৰ কৰাত সহায় কৰিছো ৷ আইছিছৰ 100 শতাংশ কেলিফেট আৰু ইয়াৰ প্ৰতিষ্ঠাপক আবু বাকৰ অল-বাগদাদীক নিধন কৰিছো ৷ একে সময়তে বিশ্বৰ প্ৰখ্যাত সন্ত্ৰাসবাদী কাছেম চুলেইমানিকো নিধন কৰিছো ৷ পূৰ্বৰ প্ৰশাসনৰ দৰে মই নতুন যুদ্ধৰ পৰা আমেৰিকাক আঁতৰাই আনি আমাৰ সৈনিকসকলক নিজ দেশলৈ ওভোটাই আনিছো ৷" ট্ৰাম্পে এইদৰে কয় ৷

মাইথোচ লেবৰ মুখ্য কাৰ্যবাহী বিষয়া প্ৰিয়াংক মাথুৰক স্মিতা শৰ্মাই মধ্য-প্ৰাচ্যত ট্ৰাম্পৰ শান্তি নীতি আৰু বাগদাদী আৰু কাছেম চুলেইমানিৰ নিধনৰ পিচত এয়া নিৰ্বাচনৰ বিষয় হ'ব নেকি বুলি সোধা প্ৰশ্নৰ উত্তৰত কয় যে, "সাধাৰণতে বৈদেশিক নীতি আমেৰিকাৰ নিৰ্বাচনৰ বিষয় নহয় ৷ কিন্তু এয়া দুটা দিশত সম্ভৱ ৷ এয়া বিশেষ হ'ব পাৰে কাৰণ ইজৰাইল হৈছে বৈদেশিক নীতিৰ এক বিশেষ শাখা ৷ সোপন্থীসকলৰ বাবে বিশ্বাস হৈছে এক বৃহৎ অংশ ৷ ইজৰাইল সোপন্থী চিন্তাৰ সৈতে বিশ্বাসী ৷" শান্তি চুক্তিৰ ভাল-বেয়ালৈ লক্ষ্য নকৰি একমাত্ৰ ধৰ্মীয় কাৰণ সন্দৰ্ভত আঙুলিয়াই দি এইদৰে কয় মাথুৰে ৷ "কাছেম চুলেইমানি অথবা বাগদাদি ওছামা বিন লাডেনৰ দৰে বৃহৎ নাম নহয় ৷ আপুনি ক'ব পাৰে যে, ইয়াক পুনৰবাৰে কৰিবলৈ চেষ্টা কৰা হৈছে ৷ তেওঁলোকে এয়া আমাৰ বিন লাডেন আছিল আৰু তাক আমি নিধন কৰিছো বুলি প্ৰমাণ কৰিব বিছাৰিছে ৷ কিন্তু অধিকাংশ আমেৰিকানে নাজানে যে, কাছেম চুলেইমানি কোন হয় ৷" ওবামাৰ সময়ত লাডেনক হত্যা কৰাৰ পিচত আমেৰিকাৰ নেভী ছীলে পালন কৰা উৎসৱৰ বিষয়ে ৰোমন্থন কৰি এইদৰে উল্লেখ কৰে মাথুৰে ৷

এই আলোচনাত পোষ্টেল বেলটক লৈ উত্থাপন হোৱা বিতৰ্ক সন্দৰ্ভতো গুৰুত্ব প্ৰদান কৰা হয় ৷ কোভিড-19 আৰু ভোটাৰৰ অধিকাৰক আগত ৰাখি পোষ্টেল বেলটৰ ব্যৱস্থাৰ বিষয়ে উল্লেখ কৰা হৈছিল ৷ আলোচনাত অংশগ্ৰহণকাৰীসকলে এইটো মানি লয় যে, নিৰ্বাচনৰ ফলাফল কিছুসংখ্যক ভাৱে জটিলতৰ হৈ পৰিব পাৰে কিয়নো 4 নৱেম্বৰত নিৰ্বাচনৰ ফলাফল ঘোষণা কৰাৰ বিপৰীতে এসপ্তাহ পিছুৱাই দিয়া হ'ব পাৰে ৷

লগতে পঢ়ক-জম্মু-কাশ্মীৰৰ পুলৱামাত নিহত 3 সন্ত্ৰাসবাদী